Адлия вазирлиги Крипто-активлар айланмаси соҳасидаги хизматлар провайдерлари фаолиятини лицензиялаш тартиби тўғрисидаги низомга киритилган ўзгартириш ва қўшимчаларни давлат рўйхатидан ўтказди. Ҳужжат 2026 йил 29 июнда 3380-3 рақами билан рўйхатдан ўтган.

Янги тартибга кўра, хизматлар провайдерлари жиноий фаолиятдан олинган даромадларни легаллаштириш, терроризмни молиялаштириш ҳамда оммавий қирғин қуролини тарқатишни молиялаштиришга қарши кураш соҳасида халқаро ҳамкорликда иштирок этмайдиган давлатларда доимий яшайдиган, бўлиб турган ёки рўйхатдан ўтган шахслар томонидан бошқарилиши мумкин эмас.

Эндиликда хизматлар провайдерлари лицензияловчи орган билан қатор қарорларни мажбурий тарзда келишиши лозим. Жумладан, устав капиталидаги улушларни жисмоний ва юридик шахсларга, шу жумладан норезидентларга реализация қилиш лицензияловчи орган билан келишилади.

Шунингдек, ташкилот раҳбари, унинг ўринбосарлари ҳамда жиноий даромадларни легаллаштириш, терроризмни молиялаштириш ва оммавий қирғин қуролини тарқатишни молиялаштиришга қарши курашиш бўйича таркибий бўлинма раҳбарини алмаштириш ҳам олдиндан келишув асосида амалга оширилади.

Низомга мувофиқ, лицензияловчи орган келиб тушган аризани қабул қилган кундан бошлаб 10 иш куни ичида келишиш ёки рад этиш ҳақида қарор қабул қилади.

Бунда келишиш бўйича аризани кўриб чиқиш ва қарор қабул қилиш учун ҳеч қандай йиғим ундирилмайди.