Эркакнинг топганида барака бор, деган тушунча тўғри айтилган. Сабаби, улар пулларни қандай сарфлашни билишади, аёллар эса ҳуда-беҳудага пул кетказишни яхши кўришади, кўп харажат қилишади. «Эркакнинг ишлаб топган пули ўзининг эмас, балки хотинининг кийимига қараб аён бўлади», дейишади ирландлар. Эркакларда ақл, аёлларда эса ҳиссиёт биринчи ўринда бўлгани сабабли, оила бошлиқлари ортиқча пул сарфлайвермайди.

Лекин бир ҳақиқат ҳам бор: эркаклар камхарж бўлганликлари билан аёллар пулнинг қаердан келишини сезадилар. Демак, аёл эркаксиз, эркак аёлсиз иш қила олмайди. Эркакнинг пулини кўпайтирадиган, даромад йўлини очадиган барибир аёлдир.

Азиз аёллар, қанчалик очиқчеҳра, тетик, қувноқ, оптимист бўлсангиз, турмуш ўртоғингиз учун пул келиши оқимини шунчалик очиб бераверасиз. Бу ҳаёт қонуни, аёл қувват бераверади, эркак пулни тўғри сарфлаб, даромадини орттираверади. Шу тариқа биз бир-биримизга шерикмиз, ўзаро боғланганмиз.

Яна бир гап, бахтли бўлсангиз, омад тез келади. Чунки ички уйғунлик, хурсандчилик билан муваффақиятга тезроқ эришасиз. Оилангиз тинч, фарзандларингиз билан хурсанд бўлиб юрсангизгина, омад сизга ўз эшикларини очади. Бунга зид ўлароқ, ҳар кунингизни ношукрликда ўтказсангиз, ҳаётингиздан салбий томонларни излайверсангиз, омадни ўзингиздан узоқлаштирасиз.

Фақатгина катта омадга эришгандан сўнг хурсанд бўлиш керак эмас. Эҳтимол ҳозир ҳам омадлидирсиз, буни илғамаётгандирсиз? Кўряпсизми, ниманидир қила оляпсизми, эшитяпсизми, шукр қилинг. Ҳатто энг митти ютуғингизни ҳам нишонланг. Энг кичик ютуғига хурсанд бўлган, шукрона айтган одамга коинот катта ютуқлар беради. Аввал майда омадларни эслаб шукр қилинг, кейин катта муваффақиятлар келади. Катта натижаларга эришиш учун аввал кичик ютуқларни қайд этиш керак. Митти муваффақиятларни ўз вақтида тан олиш, эътибор қаратиш, қувониш, шукр қилиш зарур.

Ҳар кунги ютуқларни инобатга олиш ҳам ниҳоятда муҳим. Шундай қилиб кўринг, кайфиятингиз кўтаринки бўлишини кўрасиз! Бирор юмушни «бажаришим керак» деб амалга оширманг, балки буни чин дилдан хоҳланг. Керак деб ҳисобласангиз, у сизга юк бўлиб қолади. Аксинча, шу ишни хоҳлайман, уни амалга оширганим қандай яхши бўлди, десангиз, руҳиятингиз ҳам кўтарилади, бу янада кўпроқ ютуқларга эришишга кўмаклашади. Ҳаётий қилиб айтганда, сиз «керак» деган сўзни олиб ташлаб, ўрнига «хоҳлайман» деган сўзни қўлланг.

(«Гўзал ҳаёт тилсими» китобидан)