АҚШ президенти Дональд Трамп ўзи тузган Тинчлик кенгаши «тарихий келишув»га эришганини маълум қилди.

Унинг айтишича, келишув ҲАМАС ҳамда Ғазо секторидаги бошқа гуруҳларни тўлиқ қуролсизлантиришни назарда тутади.

Трамп бу келишув Ғазо секторида янги Фаластин ҳукуматини шакллантириш йўлидаги муҳим қадам бўлишини таъкидлади. Унинг сўзларига кўра, янги ҳукумат Фаластин халқига ёрдам кўрсатиш масаласида Тинчлик кенгаши билан яқин ҳамкорлик қилади.

ҲАМАС вакили Ғози Ҳамад Al Jazeera телеканалига берган изоҳида қуролсизланиш учун Исроил қўшинлари Ғазо секторини тарк этиши кераклигини билдирди.

Reuters суҳбатлашган америкалик расмийнинг айтишича, Исроил ҲАМАСнинг қуролсизланиши мумкинлиги ҳақидаги баёнотга катта шубҳа билан қарамоқда.

Исроиллик расмий эса Трампнинг баёнотидан олдин агентликка берган изоҳида мамлакатнинг талабларини маълум қилган. Унга кўра, ҲАМАС тўлиқ қуролсизланиши, қуроллар Ғазо секторидан олиб чиқилиши ва ҳудуд бутунлай демилитаризация қилиниши керак.

Исроил томони бу шартлар бажарилишини кейинги ҳар қандай жараённи бошлаш учун дастлабки талаб деб ҳисобламоқда.