АҚШ зарбхонаси президент Доналд Трамп тасвири туширилган, номинали 1 доллар бўлган коллекцион тангани муомалага чиқарди. Шу тариқа, Трамп сўнгги 100 йил ичида портрети Америка пулида акс эттирилган биринчи тирик АҚШ президенти бўлди.

Трампнинг сурати, шунингдек, «Озодлик» ва «Биз Худога ишонамиз» деган ёзувлар туширилган танга АҚШнинг 250 йиллигига бағишланган.

АҚШ зарбхонаси 25 та тангадан иборат тўпламни 61 доллардан, 100 та тангали қопчани эса 154 доллар 50 центдан сотувга чиқарди. Бироқ тангалар сотувга чиқарилганидан бир неча соат ўтиб, зарбхона сайтида улар «ҳозирча мавжуд эмас» деган хабар пайдо бўлди.

Зарбхона маълум қилишича, Трамп тасвири туширилган танга «ушбу тарихий воқеани нишонлаш» доирасида чиқарилган ва замонавий коллекцияларга «муносиб қўшимча» бўлиши кўзда тутилган.

Тангаларни зарбхона сайтидан ташқари, Вашингтонда жойлашган АҚШ зарбхонасининг махсус савдо автоматларидан ҳам харид қилиш мумкин.

Тангалар ташқи кўринишидан олтинга ўхшайди, аммо уларнинг таркибида олтин йўқ. Улар 88,5 фоиз мисдан, қолган қисми эса рух, марганец ва никелдан иборат.

Жорий йил май ойида АҚШ молия вазири Скотт Бессент мамлакатнинг 250 йиллиги муносабати билан Доналд Трамп портрети туширилган 250 долларлик банкнота чиқариш режалаштирилаётганини маълум қилган эди.