«Делфин» тўфони Хитойнинг шарқий соҳилларига ёпирилди. Натижада кучли ёмғир ва шамоллар кузатилиб, тошқинлар ҳамда кўчкилар хавфи юзага келди.

Тўфон аввал Япониянинг жанубидаги Окинава префектурасидан ўтиб, олти кишининг жароҳатланишига ва 50 мингдан ортиқ бинода электр таъминоти узилишига сабаб бўлди.

Прогнозларга кўра, Хитойнинг Чжэцзян, Шанхай, Фуцзян провинциясининг шимоли, Цзянси провинциясининг шимоли-шарқи, Анхойнинг марказий ва жанубий қисмлари ҳамда Цзянсунинг катта қисмида кучли ёмғир ёғиши кутилмоқда.

Чжэцзяннинг марказий ва шарқий ҳудудларида айрим жойларга 250–500 миллиметргача ёғингарчилик тушиши мумкин.

Метеорологларнинг маълум қилишича, қуруқликка чиққанидан сўнг «Делфин» ғарбга қараб ҳаракатланади, кейин Хитойнинг марказий ва жануби-ғарбий ҳудудлари устидан секинлашиб, аста-секин кучсизланади. Бу кучли ёмғирнинг узоқроқ давом этиши, айниқса тоғли ҳудудлар ва кичик дарёлар бўйида тошқин ҳамда кўчкилар хавфининг ортишига олиб келиши мумкин.

Тўфон сабаб мамлакат шарқида транспорт қатнови кенг миқёсда издан чиқди. 1 миллиондан ортиқ киши ўз уйларидан эвакуация қилинди.

Шанхайда камида 30 300 киши хавфсиз жойларга кўчирилди, қарийб 1 500 та авиарейс бекор қилинди.

Қўшни Чжэцзян провинциясидаги Вэньчжоу шаҳрида 900 мингдан ортиқ аҳоли бошқа жойларга кўчирилди ва 1 мингдан зиёд фавқулодда бошпана ташкил этилди.

Фуцзян провинциясида эса хавфли ҳудудлардан 98 900 киши эвакуация қилинган. Шунингдек, 55 та соҳил йўловчи паром йўналиши вақтинча тўхтатилган, 115 та денгиздаги қурилиш лойиҳасида ишлар бекор қилинган ва 290 та қурилиш кемаси хавфсиз ҳудудларга олиб ўтилган.

Хитой Сув ресурслари вазирлиги Цянтан, Юн, Цзяо ва Шуйян дарёларида сув сатҳи сезиларли кўтарилиши мумкинлигидан огоҳлантирди. Энг кўп зарар кўрган ҳудудлардаги кичик дарёларда ҳам сув сатҳи хавфли кўрсаткичдан ошиб кетиши мумкин.

Шанхайдаги Яншан портида кемалар причаллардан чиқарилиб, 500 дан ортиқ кичик ва ўрта ҳажмдаги кема хавфсиз жойларга кўчирилган.