Шу кунларда пойтахтда ўтказилаётган Тошкент халқаро инвестиция форуми доирасида «Uzbekistan Airports» АЖ ҳамда таркибига «Sojitz Corporation» (Япония) ва «Incheon International Airport Corporation» (Корея Республикаси) компаниялари кирувчи, «Vision Invest» (Саудия Арабистони) бошчилигидаги халқаро консорциум ўртасида Тошкентнинг янги халқаро аэропортини қуриш ва келгусида ундан фойдаланиш бўйича давлат-хусусий шериклик тўғрисидаги битим имзоланди.

Битим имзоланишидан олдин кенг кўламли тайёргарлик ишлари олиб борилди. Хусусан, халқаро молия институтлари талабларига мувофиқ экологик ва ижтимоий баҳолашлар ўтказилди, давлат-хусусий шериклик тўғрисидаги битим ишлаб чиқилди, муҳандислик коммуникацияларини кўчириш бўйича лойиҳа ҳужжатлари тайёрланди ҳамда бўлажак аэропорт ҳудудини ҳозирлаш ишлари бошлаб юборилди.

«Таъкидлаш лозимки, аэропорт лойиҳаси мамлакат президенти ташаббуси билан Ҳукумат, Иқтисодиёт ва молия вазирлиги ҳамда Транспорт вазирлиги кўмагида ишлаб чиқилган. Бугун барчамиз уни амалга ошириш йўлида муҳим қадам қўйдик. Тошкентнинг янги халқаро аэропорти ўнлаб йиллар давомида йўловчи ва юк ташишнинг ўсиб бораётган эҳтиёжларини қондира оладиган замонавий технологик авиация хабига айланади. Етакчи халқаро компаниялар билан ҳамкорлик туфайли биз нафақат сармоя, балки энг сўнгги технологиялардан фойдаланган ҳолда дунёдаги энг йирик аэропорт мажмуаларини лойиҳалаш, қуриш ва бошқариш бўйича ноёб тажрибага эга бўламиз. Ишончим комилки, ушбу лойиҳа Ўзбекистон авиация саноатини ривожлантиришда янги босқич бўлади ва мамлакатимизнинг Марказий Осиёдаги асосий транспорт маркази сифатидаги мавқеини мустаҳкамлайди», — деди «Uzbekistan Airports» бошқаруви раиси Жавлонбек Умархўжаев.

Эслатиб ўтамиз, Президентнинг 2025 йил 25 ноябрдаги 353-сонли қарори билан қурилиши белгиланган пойтахтнинг янги аэропорти Тошкент вилоятининг Ўрта Чирчиқ ва Қуйи Чирчиқ туманлари ҳудудида, умумий майдони 1310 гектар бўлган майдонда жойлашади.

Лойиҳанинг биринчи босқичида ҳар бирининг узунлиги 4 км бўлган иккита учиш-қўниш йўлаги, 208 минг квадрат метр майдонга эга йўловчи терминали, ҳаво кемалари учун 98 та тўхташ жойи, ёқилғи қуйиш мажмуаси ва замонавий ҳаво ҳаракатини бошқариш диспетчерлик минораси қурилиши кўзда тутилган.

2030 йил охирида фойдаланишга топширилиши мўлжалланаётган аэропорт йилига 20 миллион йўловчига ва 300 минг тоннагача юкларга хизмат кўрсатиш имкониятига эга бўлади.

Имзоланган битимга кўра, хусусий шериклар консорциуми йўловчи терминали ва вокзал атрофи майдонини қуриш ҳамда кейинчалик эксплуатация қилишни ўз зиммасига олади, давлат шериги эса аэродром мажмуасини қуриш ва эксплуатация қилишни таъминлайди.

Тасдиқланган жадвалга мувофиқ, жорий йилнинг июнь ойида муҳандислик тармоқларини кўчиришни бошлаш, ҳудудни тайёрлашни якунлаш ва босқичма-босқич қурилиш ишларини бошлаш режалаштирилган.