O‘zbekiston 2026-yilning yanvar–aprel oylarida 44 ta xorijiy davlatga 24,5 million AQSh dollari qiymatidagi 21,4 ming tonna mayiz eksport qildi. Bu haqda Milliy statistika qo‘mitasi ma’lum qildi.

Qayd etilishicha, eksport hajmi o‘tgan yilning shu davriga nisbatan qariyb 5,4 ming tonnaga yoki 33,5 foizga oshgan. Eksport geografiyasining 44 ta davlatni qamrab olgani mahalliy mahsulotning xalqaro bozorlarda raqobatbardoshligini namoyon etmoqda.

Bu davrda O‘zbekiston mayizining eng yirik xaridori Qozog‘iston bo‘ldi. Qo‘shni davlatga 7,3 ming tonna mahsulot yetkazib berilgan.

Ikkinchi o‘rinda 2,2 ming tonna bilan Xitoy qayd etilgan bo‘lsa, Rossiya bozoriga 2,1 ming tonna mayiz eksport qilindi. Shuningdek, Turkiyaga 2 ming tonna mahsulot jo‘natilgan.

Ozarbayjon 801 tonna, Birlashgan Arab Amirliklari esa qariyb 740 tonna mayiz import qilgan. Qolgan 6,2 ming tonna mahsulot boshqa davlatlar hissasiga to‘g‘ri keladi.

Ta’kidlash joizki, eksport hajmining bir yilda 33,5 foizga o‘sishi tashqi bozorlarda o‘zbek quritilgan mevalariga bo‘lgan talab ortib borayotganini ko‘rsatadi.