Prezident Shavkat Mirziyoyev tegishli qaror bilan Toshkent shahrida FIFAning Markaziy Osiyo mamlakatlari uchun mintaqaviy ofisini ochish to‘g‘risidagi takliflarga rozilik berdi.

Belgilanishicha:

• mintaqaviy ofisni tashkil etish va saqlash xarajatlari birinchi navbatda FIFA tomonidan ajratiladigan mablag‘lar, yetmagan qismi esa O‘zbekiston futbolni qo‘llab-quvvatlash jamg‘armasi mablag‘lari hisobidan, biroq umumiy xarajatlarning 50 foizidan oshmagan miqdorda qoplanadi;
• mintaqaviy ofis Toshkent shahri Islom Karimov ko‘chasi 98a-uy manzilida joylashgan O‘zbekiston futbol assotsiatsiyasining binosida beg‘araz asosda joylashtiriladi;
• mintaqaviy ofis binosini ta’mirlash, zarur mebel, jihoz, texnika va transport vositalari bilan ta’minlash xarajatlari O‘zbekiston Respublikasi Prezidentining 2023-yil 3-noyabrdagi PQ–355-son qaroriga muvofiq Tiklanish va taraqqiyot jamg‘armasidan ajratiladigan mablag‘lar hisobidan qoplanadi. Bunda minimal saqlash talablari O‘zbekiston futbol assotsiatsiyasi tomonidan belgilanadi.