Xalqaro futbol federatsiyasi (FIFA) Saudiya Arabistoni mezbonlik qiladigan 2034-yilgi jahon chempionatini 2035-yilning yanvariga ko‘chirish imkoniyatini o‘rganmoqda, deb xabar berdi The Guardian.

Rejaga ko‘ra, Saudiyadagi mundial 2034-yilning noyabr-dekabr oylarida o‘tkazilishi kerak edi. Ammo bu payt Ramazon oyiga to‘g‘ri keladi va ma’lum sabablarga ko‘ra, musobaqalarni o‘tkazish imkonini bermaydi. FIFA prezidenti Janni Infantino tashkilot bo‘lajak turnir taqvimini muhokama qilishni boshlaganini tasdiqladi.

«Balki taqvimni optimallashtirish yo‘llari bordir, biz buni muhokama qilyapmiz. Oldindan xulosa qilishga shoshilmaslik kerak», — dedi Infantino.

Saudiya Arabistonining iqlim sharoiti ham mundial o‘tkaziladigan sanalarni tanlashga ta’sir ko‘rsatadi. Yoz oylari +52°C gacha bo‘lgan ekstremal harorat tufayli musobaqalarni o‘tkazib bo‘lmaydi. Xuddi shu sababli 2022-yilda Qatardagi jahon chempionati ham qishda o‘tkazilgan edi.

Turnir sanalari bo‘yicha yakuniy qaror saudiyalik tashkilotchilar bilan bamaslahat va va barcha futbol tashkilotlarining manfaatlarini hisobga olgan holda qabul qilinadi. Ko‘chirish milliy chempionatlar va Yevropa klublari turnirlari taqvimlari bilan muvofiqlashtirishni talab qiladi, deyiladi xabarda.

Ma’lumot uchun: futbol bo‘yicha jahon chempionatlari, xuddi Olimpiya o‘yinlari singari (koronavirus pandemiyasi tufayli 2021-yilga ko‘chirilgan Tokio-2020 olimpiadasini istisno qilganda), doim juft yillarda o‘tkazib kelingan.