AQSh prezidenti Donald Tramp ijtimoiy tarmoqda bayonot berib, AQSh harbiy kuchlari Eron atrofida «real kelishuv» to‘liq bajarilmaguncha qolishini ma’lum qildi. U kelishuv buzilsa, yanada keng ko‘lamli mojaro yuzaga kelishi mumkinligini ta’kidladi.

Shu bilan birga, Livanda Isroil zarbalari oqibatida bir kunda kamida 254 kishi halok bo‘ldi, 1 165 dan ortiq odam jarohat oldi. Mamlakatda motam kuni e’lon qilindi.

Livan bosh vaziri Navaf Salom barcha siyosiy va diplomatik imkoniyatlarni ishga solib, hujumlarni to‘xtatishga harakat qilayotganini bildirdi.

«Isroil tinch aholi zich joylashgan hududlarga hujum qilib, himoyasiz odamlarni o‘ldirmoqda.

Livan barcha do‘stlarini mavjud imkoniyatlar orqali bu tajovuzni to‘xtatishga yordam berishga chaqiradi», – deydi Salom Isroilni xalqaro gumanitar huquq normalarini butunlay mensimaslikda ayblab.

Isroil bosh vaziri Binyamin Netanyaxu Livan AQSh–Eron o‘rtasidagi sulh kelishuviga kiritilmaganini aytdi. AQSh vitse-prezidenti Jey Di Vens ham «bunday va’da bermaganmiz» deya ta’kidladi.

Eron tashqi ishlar vaziri Abbos Aroqchi esa AQSh Livan bo‘yicha tanlov oldida ekanini bildirib, «yo sulh, yoki Isroil orqali urush» degan pozitsiyani ilgari surdi.

Shuningdek, Livan sog‘liqni saqlash vaziri Rakan Nosiriddin xalqaro hamjamiyatdan yordam so‘radi, chunki tibbiyot tizimi ommaviy jabrlanganlarga xizmat ko‘rsatishda qiynalmoqda.