Австралиянинг интернет хавфсизлиги бўйича регулятори – eSafety комиссари Telegram’га қарши Федерал судга мурожаат қилди. Платформа террорчилик ва зўравон экстремизмга алоқадор материалларни ўчириш бўйича қонун талабларини бажармаганликда гумон қилинмоқда.

Регулятор баёнотига кўра, гап террорчилар томонидан амалга оширилган қотилликлар, оммавий отишмалар ҳамда 2019 йилги Крайстчерч ва 2022 йилги Буффало ҳужумлари билан боғлиқ видеолар ҳақида кетмоқда.

eSafety комиссари Жули Инман Грантнинг таъкидлашича, айрим материаллар Telegram огоҳлантирилганидан кейин ҳам узоқ вақт давомида фойдаланувчилар учун очиқ қолган.

Судга тақдим этилган ҳужжатларга кўра, австралиялик Telegram фойдаланувчилари 2025 йилнинг июл–октябр ойларида террорчиликни тарғиб қилувчи 12 та пост устидан шикоят қилган.

Регуляторнинг даъво қилишича, Telegram ушбу материалларнинг 10 тасини ўчирмаган. Шунингдек, уларни тарқатган аккаунт, гуруҳ ёки каналларга нисбатан ҳам етарли чора кўрилмаган. Учта постда аввалдан террорчилик материали сифатида тан олинган контент бўлгани айтилмоқда.

Австралияда 2024 йил декабридан бошлаб онлайн платформалар болалар эксплуатацияси ва террорчиликни тарғиб қилувчи материалларнинг тарқалишини камайтириш бўйича мажбурий чоралар кўриши шарт.

Агар суд Telegram қонун талабларини бузган деб топса, компанияга 54,6 миллион Австралия долларигача – тахминан 38 миллион АҚШ доллари миқдорида жарима солиниши мумкин.

Ўз навбатида, Telegram вакили компания Австралия регуляторининг даъволарини қабул қилмаслиги ва уларга судда эътироз билдиришини маълум қилган.

Компания ўзининг террорчиликка қарши кураш бўйича фаолияти ҳужжатлар билан тасдиқланганини таъкидлаб, 2026 йилнинг ўзида минглаб экстремистик ҳамжамиятлар блокланганини билдирди.

Эслатиб ўтамиз, бу Австралия регулятори ва Telegram ўртасидаги биринчи баҳс эмас. 2025 йил февралда платформа террорчилик ва болалар эксплуатациясига оид контентга қарши қандай чоралар кўраётгани ҳақидаги ҳисоботни беш ойдан ортиқ кечиктиргани учун қарийб 958 минг Австралия доллари миқдорида жаримага тортилган эди.

Бир муддат аввал эса Россия ҳукумати ҳам Telegram асосчиси Павел Дуровни терроризмга ёрдам берганликда айблагани айтилган эди.