АҚШнинг собиқ президенти Барак Обама Исроилни фаластинликлар ерларини тортиб олишда айблади. The Jerusalem Post нашри хабар беришича, Обама бу ҳақда Шимолий Ирландия пойтахти Белфастдаги чиқишида гапирган.

2023 йил 7 октябр куни ҲАМАС ҳаракати ҳужумига жавобан Исроил армияси Ғазо секторига бостириб кириб ўн минглаб тинч аҳоли вакиллари ўлимига сабаб бўлгани маълум.

Барак Обаманинг фикрича, 7 октябр ҳодисасидан кейин Исроилга нисбатан дунё миқёсида салбий муносабатнинг кучайиши Фаластин билан зиддиятни чин маънода ҳал этиш лозимлигидан далолат беради.

Обама яҳудий халқи асрлар мобайнида таъқиб-тазйиққа учраганини ёдга олган. Айни чоқда, у Исроил давлатининг ташкил этилиши ортидан Фаластин халқи ерлари тортиб олинганини қайд этган. Шунга кўра, вазиятни адолатсиз деб баҳолаб, ерларини қайтариб олиш учун курашаётган фаластинликларнинг хатти-ҳаракатини тушунмоқ керак.  

Маълумки, Исроил сўнгги уч йил ичида Яқин Шарқда нафақат Фаластин, балки Сурия, Ливан, Эрон, Яман, Қатар каби давлатларга ҳам ҳужум уюштирди.

Барак Обама Исроил ҳарбий, техник устунликдан фойдаланиб кескин қадамлар ташлаётган бўлса-да, ахлоқий жабҳада устунликни бой бераётганидан огоҳлантирган.

«Агар Исроил “бугун биз минтақада энг кучли ва технологик жиҳатдан ривожланганмиз, хавфсизлигимиз учун барча керакли чораларни кўрамиз, истаган нарсамизни тортиб оламиз, ҳеч қандай ён беришга бормаймиз” деган позицияни эгаллаган экан, бу яқин истиқболда ўзини оқлаши мумкин. Аммо бундай позицияни эгаллаш билан сиз ахлоқий устунликни бой берасиз», — деб таъкидлаган АҚШ собиқ раҳбари.

Таҳлилчиларга кўра, Исроил маъмурияти мустақил Фаластин давлати тузиш ғоясига тиш-тирноғи билан қарши чиқмоқда.

Аввал хабар берганимиздек, 2024 йил 18 июл куни Исроил парламентида кўпчилик овоз билан Фаластин давлати ташкил этилишини рад этувчи қарор қабул қилинди. Кнессет қарорига халқаро ташкилотлар етакчилари, жумладан, БМТ бош котиби Антониу Гутерриш эътироз билдирди. Бош котиб таъкидича, 1967 йилги чегараларда, пойтахтлари Қуддус бўлган мустақил, суверен ва демократик икки давлат мавжудлиги минтақада барқарорлик ўрнатишнинг ягона оқилона йўли саналади.

Маълумот ўрнида: Исроил парламенти 2025 йил 23 июл куни Ғарбий Соҳилни ўз ҳудудига қўшиб олиш ҳақида қарор қабул қилганди. Бу қарор ҳам халқаро ҳамжамият томонидан кескин қораланган.

Барак Обама бундай кескин позицияни эгаллаган Исроил ҳукумати келажакда яҳудийлар минтақада тинч-омон яшаш ҳақида ҳам қайғуриши кераклигини эслатган.  

«Етти миллион фаластинлик ҳеч қаерга ғойиб бўлмайди», — деган у.