Европа парламенти Россия Федерацияси томонидан украиналик болаларга нисбатан содир этилган хатти-ҳаракатларни геноцид дея тан олувчи ҳужжатни қабул қилди. Қонунчилик идораси Европа Иттифоқи мамлакатларини ҳам геноцид фактини тан олишга чақирган.

Қонун лойиҳасини 536 нафар депутат қўллаб-қувватлаган, 8 нафари қарши чиққан, 37 нафари эса овоз беришдан тийилган.

Европарламент БМТнинг геноцидга оид конвенциясига таяниб шундай қарор қабул қилган. Ушбу ҳужжатда муайян миллий, этник, ирқий ёки диний гуруҳга мансуб болаларни мазкур гуруҳни бутунлай ёки қисман йўқ қилиш мақсадида зўравонлик йўли билан кўчириш геноцид акти деб баҳоланган.  

Европа парламенти қабул қилган резолюцияда украиналик болаларни тизимли равишда туғилган жойидан кўчириш, депортация қилиш ва мажбурий тарзда руслаштириш кескин қораланган.

Европарламентнинг Латвиядан сайланган депутати Рихардс Колс фикрича, ушбу ғайриқонуний хатти-ҳаракат Россиядаги минглаб давлат хизматчилари, лагерлар раҳбарлари ва ишғол остидаги маъмуриятлар мулозимлари иштирокида содир этилмоқда.

ЕИ бош дипломати Кая Каллас эса босиб олинган ҳудудлардан украиналик болаларни Россияга мажбуран кўчириш президент Владимир Путин шахсан маъқуллаган сиёсат эканини таъкидлаган.

Европалик қонун ижодкорлари мажбуран кўчирилган болаларни зудлик билан, ҳеч қандай шартларсиз ватанига қайтариш Москва билан музокараларда асосий масалалардан бири бўлишини баён қилган.

2026 йил сентябр ҳолатига кўра, Россия томонидан 20651 нафар украиналик болаларнинг мажбуран кўчирилиши ёки депортация қилиниши тасдиқланган. Айни пайтда 1,6 миллион нафар украиналик болалар Россия босиб олган ҳудудларда қолаётгани айтилмоқда.  

Аввал хабар берганимиздек, 2023 йилда Ҳаагада жойлашган Халқаро жиноий суди Россия президенти Владимир Путин ва болалар ҳуқуқлари бўйича омбудсман Мария Лвова-Беловани ҳибсга олишга ордер берганди. Ушбу ордер айнан Россия қўшинининг Украинага бостириб кириши ва унинг оқибатида Украинадан болаларнинг Россияга ноқонуний депортация қилиниши билан боғлиқ.

Европалик депутатлар ушбу хатти-ҳаракат учун нафақат Россиянинг олий раҳбарияти, балки уни содир этишда қатнашаётган барча шахслар жавобгарликка тортилиши лозим деб ҳисоблайди.