Францияда 24 октябр куни навбатдаги умуммиллий норозилик намойишлари ўтказилмоқда. Ҳукумат эҳтимолий тартибсизликларнинг олдини олиш учун 70 минг нафар полициячи ва жандармни сафарбар қилди. Парижда эса намойиш йўналишининг сўнгги дақиқаларда ўзгартирилиши ташкилотчилар ва ҳукумат ўртасидаги зиддиятни кучайтирди.

Бу ҳақда Euronews хабар бермоқда.

Дастлаб Париждаги йирик намойиш Бастилия майдонидан Нация майдонигача бўлган, аввалдан келишилган йўналишда ўтказилиши режалаштирилган эди. Бироқ полиция префектураси 23 октябр куни кечқурун хавфсизлик билан боғлиқ хатарларни баҳона қилиб, юришни пойтахтнинг жануби-шарқий қисмидаги бошқа кўчаларга кўчиришга қарор қилди.

Касаба уюшмалари ва намойиш ташкилотчилари бундай ўзгариш тартибсизликлар хавфини янада оширишини таъкидлаб, қарор устидан судга шикоят қилди. Аммо 24 октябр куни Париж маъмурий суди уларнинг шикоятини рад этди.

Франциядаги навбатдаги норозиликлар 17 октябрда кузатилган оммавий тартибсизликлар ортидан ўтказилмоқда.

Расмий маълумотларга кўра, ўша куни мамлакат бўйлаб 3 мингдан ортиқ савдо объектига зарар етказилган ёки улар талон-торож қилинган. Хавфсизликни таъминлашга 60 минг нафар полициячи ва жандарм жалб этилганига қарамай, айрим шаҳарларда вазият назоратдан чиққан.

Франция ички ишлар вазири Лоран Нуниес 24 октябрда хавфсизлик чоралари янада кучайтирилишини маълум қилганди. Бу сафар 70 минг нафар ҳуқуқ-тартибот ходимига махсус бўлинмалар, зирҳли техникалар ва сув пуркагич машиналар ёрдам беради.

Le Monde нашрига кўра, полиция разведкаси Парижнинг ўзида 60 мингдан 120 минггача одам намойишларга чиқиши мумкинлигини тахмин қилган.

Шунингдек, мамлакатнинг айрим шаҳарларида ҳаракатланишга вақтинчалик чекловлар жорий этилган. Парижда Лувр, Орсе ва бошқа йирик музейлар хавфсизлик сабабли ташриф буюрувчилар учун ёпилган.

Маълумот учун, норозиликларнинг асосий сабаблари орасида таълим тизимидаги муаммолар, турмуш қийматининг ошиши ва ижтимоий тенгсизликка қарши эътирозлар бор.

Талабалар ташкилотлари таълим тизимини модернизация қилиш учун қўшимча 10 миллиард евро ажратилишини талаб қилмоқда.

Франция президенти Эммануэл Макрон 23 октябр куни мактаб ўқувчилари вакиллари билан учрашиб, университетларга қабул қилишда қўлланиладиган Parcoursup тизимини кенг кўламда ислоҳ қилиш зарурлигини билдирган.

Бош вазир Себастьен Лекорню ҳам таълим соҳасидаги муаммоларни ҳал этишга қаратилган янги ташаббусларни тақдим этишга ваъда берган.

Бироқ талабалар ташкилотлари аниқ қарорлар қабул қилинмагунча норозилик намойишларини давом эттиришларини маълум қилмоқда.