Кентуккидан сайланган конгрессмен Томас Мэсси (Республикачи партия) АҚШнинг НАТОдан чиқишини талаб қилувчи HR 6508 — «NATO Act» қонун лойиҳасини АҚШ Қўшма Штатлари Конгрессига киритди.

Мэсси ўз баёнотида НАТОни «совуқ уруш давридан қолган артефакт» деб атади ва АҚШ ҳукумати мамлакатдаги ресурсларни «ижтимоий йўналишдаги Европани ҳимоя қилиш» учун эмас, балки ўз ҳудудий хавфсизлиги учун сарфлаши кераклигини таъкидлади.

Конгрессменнинг фикрича, НАТО СССРга қарши ташкил этилган, аммо Собиқ иттифоқнинг парчаланиб кетганига 30 йилдан ошган. АҚШ ўзини хорижий урушларга тортиб кириши мумкин бўлган ташкилотдаги иштироки учун эса триллионлаб долларлар «товон тўлаяпти». Бундан ташқари, АҚШ Конституцияси ҳам доимий ҳарбий иттифоқларни қўлламайди ва охир-оқибат Европа давлатлари ўз ҳимояси учун ўзлари пул тўлаши керак.

Томас Мэсси таклиф этган HR 6508 қонун лойиҳасига кўра:

• Қўшма Штатлар президенти мамлакат расмий равишда ташкилотдан чиқиш учун НАТО шартномасининг 13-моддаси асосида мурожаат юбориши кераклигини таъкидламоқда. Бунда, тартибга кўра, ҳар қайси давлат расмий равишда хабардор қилгандан 1 йил кейин альянсдан чиқади;
• НАТО энди АҚШнинг манфаатларига мос келмаслиги ҳақида расмий хулоса берилиши керак;
• Европа давлатлари ўзини ҳимоя қила олади ва АҚШ «бошқа давлатларнинг хавфсизлик кафолати» бўлишни тўхтатиши керак;
• НАТОнинг фуқаролик, ҳарбий ва инфратузилма инвестиция дастурларини молиялаштириш учун АҚШнинг маблағ ажратишини тақиқлаш лозим.

Ҳудди шу мазмундаги ҳужжат лойиҳаси Сенатда ҳам бўлиб, Юта штатидан сенатор Майк Ли Сенатда HR 6508’га мос келадиган S.2174 рақамли қонун лойиҳасини киритган.