Кремлда Россия президенти Владимир Путин билан АҚШ президенти Доналд Трампнинг махсус вакиллари Стив Уиткофф ва Жаред Кушнер ўртасида музокаралар бўлиб ўтди.

Россия президенти ёрдамчиси Юрий Ушаковнинг айтишича, ёпиқ эшиклар ортидаги учрашув 3 соат 10 дақиқа давом этган.

Унинг сўзларига кўра, АҚШ вакиллари Украинадаги ҳарбий ҳаракатларни имкон қадар тезроқ тўхтатишдан манфаатдор эканини билдирган ва эҳтимолий тинчлик келишуви бўйича бир қатор таклифларни илгари сурган.

Путин эса Россия Украинада қўйилган мақсадларига эришиш ниятида эканини, можарони ҳал қилиш учун унинг «туб сабаблари» бартараф этилиши кераклигини айтган. Россия томони фронтдаги вазият бўйича ўз баҳосини ҳам АҚШ вакилларига етказган.

Ушаковнинг билдиришича, Уиткофф ва Кушнер Путиннинг позициясини Киевда бўлиб ўтадиган навбатдаги музокараларда ҳисобга олишини айтган.

АҚШ вакиллари учрашув натижалари бўйича ҳозирча очиқ баёнот бермади. Улар Москвадан Украинага йўл олди ва Владимир Зеленский билан музокара ўтказиши кутилмоқда.

Доналд Трамп учрашув арафасида Уиткофф ва Кушнер Москва ҳамда Киевга «урушни тугатиш бўйича таклиф» олиб бораётганини билдирган. Бироқ Вашингтон таклиф мазмунини очиқламаган.

Кремл маълумотига кўра, Путин 6 сентябр ярим тундан бошлаб Киевга зарба бермаслик ҳақида кўрсатма берган. Бундан аввал Владимир Зеленский ҳам АҚШ вакилларининг ташрифи пайтида Россия ҳудудига ҳаво зарбалари бермасликка тайёр эканини айтган.

Уиткофф ва Кушнернинг Украинага ташрифи Россиянинг кенг кўламли босқини бошланганидан бери уларнинг Киевга биринчи ташрифи бўлади.