Reuters ва AP маълумотларига кўра, Стив Уиткофф ва Жаред Кушнер 6 сентябр куни Киевга етиб келди. Бу уларнинг Украинага биринчи расмий ташрифидир. 

АҚШ вакиллари Зеленский билан Россия–Украина урушини тугатиш, эҳтимолий тинчлик келишуви ва Украина учун хавфсизлик кафолатларини муҳокама қилмоқда. Зеленский музокаралар олдидан Украина «конструктив мулоқот»га тайёр эканини билдирган. 

Уиткофф ва Кушнер Киевга келишидан аввал Москвада Россия президенти Владимир Путин билан уч соатдан ортиқ музокара ўтказган. Кремль учрашувда можарони ҳал қилиш бўйича бир қатор таклифлар муҳокама қилинганини билдирган, бироқ жиддий дипломатик келишувлар қайд этилмаган. 

АҚШ президенти Дональд Трамп аввалроқ Уиткофф ва Кушнер Москва ҳамда Киевга урушни тугатиш бўйича янги таклиф олиб бораётганини айтган. Вашингтон ушбу таклифнинг мазмунини ҳозирча очиқламаган.

Украина президентининг расмий сайтида ҳам Уиткофф ва Кушнер аввал Москвага, сўнг Киевга ташриф буюриши ва украин томони музокараларга тайёргарлик кўраётгани маълум қилинган эди.

Музокаралар натижалари ҳозирча эълон қилинмади.