Россия президенти Владимир Путин АҚШ етакчиси Доналд Трампни алдади ва уни ўнғайсиз ҳолга солиб қўйди. Бу ҳақда АҚШнинг Украина музокаралари бўйича собиқ махсус вакили Курт Волкер “Euronews” телеканалига берган интервьюсида гапирди.

Бу ўринда гап Трамп ва Путиннинг жорий йил 18 август кунги телефон орқали мулоқотида Россия раҳбари берган ёлғон ваъда ҳақида кетмоқда.

15 август куни икки давлат раҳбари Аляскада учрашган. Уч кун ўтиб, Трамп Оқ уйда Украина президенти Владимир Зеленский ва Европа Иттифоқи етакчиларини қабул қилган. Ўша куни ташкил этилган телефон сўзлашувида Путин Трампга Зелинский билан учрашиш ва урушни тўхтатиш юзасидан музокара ўтказишга ваъда берган.

“Аммо Путин Трампни алдади ва у бундан дарғазаб бўлди. У Трампни жуда заиф аҳволга солиб қўйди. Трамп эса кучсиз кўринишни асло истамайди. Шундай экан, бу Трамп учун қадр-қиммат масаласига айланган”, – дейди Курт Волкер.

Трамп Путин ва Зеленский юзма-юз учрашиб, урушни тўхтатиш масаласини муҳокама этиши ҳақида ишонч билан гапирганидан кейин бир неча давлат ушбу учрашувга мезбонликни таклиф этди. Аммо Кремль кейинроқ Россия ва Украина раҳбарлари учрашувини бир неча бор рад этди.

Курт Волкерга кўра, Трамп айнан Путиннинг алдови сабаб Украинага “Томагавк” ракеталарини юбориш имкониятини кўриб чиқмоқда.

Киев кўпдан буён Вашингтондан 1600-2500 км га қадар нишонларга зарба берадиган “Томагавк” ракеталарини етказишни сўраб келади. Ҳозирча Украина Россия ҳужумларига 250 км га қадар парвоз қила оладиган “Storm Shadow” ракеталари билан жавоб қайтармоқда.

Президентлик сайлови даврида Россия – Украина урушини 24 соат ичида тугатишга ваъда берган Трамп Оқ уйга келганидан буён Путин билан бир неча бор телефонда суҳбатлашди.

Бунга ҳам қаноат қилмаган республикачи сиёсатчи жорий йил 15 август куни Путин билан Аляска штатида учрашди. Икки давлат раҳбари иштирокидаги қарийб 3 соатлик музокара амалий натижасиз якунланди. Украинада ўт очишни тўхтатиш борасида жиллақурса муваққат келишувга ҳам эришилмади.

Трамп россиялик ҳамкасби билан музокарани ижобий баҳолади. У ҳатто Fox News телеканалига берган интервьюсида Путин билан учрашувга 10 баллик тизимда 10 балл қўйишини айтиб мақтанди. Аммо аксар таҳлилчилар Аляскадаги учрашув амалий натижа бермагани ҳолда Путинга катта очко келтирди деб ҳисоблайди. Умуман, Аляска саммити Оқ уйнинг мағлубияти, Кремлнинг ғалабаси ўлароқ талқин қилинди.

Сўнгги вақтларда Украинадаги урушни тўхтатиш борасида катта ваъдалар берган Трамп Путинни музокара орқали муроса йўлига сола олмаслигига кўзи етгани айтилмоқда.

Трамп ўтган ҳафта Виржиния штатидаги Куантико ҳарбий базасида армия генераллари ва қўмондонлар қаршисида сўзлаган маърузасида ҳам “Путиндан жуда ҳафсалам пир бўлди” дея ёзғирганди.