АҚШ президенти Доналд Трамп Канада товарларига 50 фоизлик бож жорий этишни уч кунга кечиктирганини маълум қилди. Божлар бугундан амал қилиши кутилган эди.

Давлат раҳбарининг таъкидлашича, мамлакатлар Канада ва АҚШ ўртасидаги Keystone XL деб номланган қувурлар тизимини кенгайтириш лойиҳаси бўйича келишувга эришган. Божларни жорий этиш шу сабабли вақтинча тўхтатилган.

«Канада ва АҚШ, ҳужжатларни якуний келишишни ҳисобга олган ҳолда, келишувга эришди! Узоқ вақт олдин уйқучи Жо Байден томонидан йўқ қилинган буюк Keystone XL қувури қайта тирилиши мумкин!» — деб ёзди Трамп Truth Social ижтимоий тармоғида.

Кейинроқ у сунъий интеллект ёрдамида яратилган, ўзи қабрдан Keystone қувурини чиқараётгани тасвирланган расмни ҳам эълон қилди.

Reuters агентлигининг қайд этишича, президентнинг ушбу баёнотидан олдин АҚШ ва Канада ҳукуматлари ўртасида бир неча ой давомида музокаралар олиб борилган. Шунингдек, Трамп кеча қўшни давлат бош вазири Марк Карни билан учрашган. Бу уларнинг бир ҳафта ичидаги иккинчи мулоқоти бўлган.

Июл ойида Трамп Канададан импорт қилинадиган кенг турдаги товарларга 50 фоизлик бож жорий этиш ҳақида фармон имзолаган эди. Ҳужжат музокараларни давом эттириш имконини бериш мақсадида бир ойдан кейин кучга кириши белгиланган.

Politico нашри хабар беришича, Вашингтон ва Оттава сўнгги бир неча кундан буён янги кенг қамровли савдо келишуви бўйича музокаралар олиб бормоқда.

Маълумотларга кўра, АҚШ Канададан Америка алкоголли ичимликларини импорт қилишга қўйилган чекловларни ва автомобилларга нисбатан божларни бекор қилишни, шунингдек, сут маҳсулотлари учун тариф квоталари бўйича ён беришни талаб қилмоқда.

Ўз навбатида, Оттава Канада автомобиллари ва бошқа товарларига нисбатан АҚШ божлари камайтирилишини кутмоқда.