Тошкент шаҳар Олмазор туманида жойлашган хусусий клиникалардан бирида бурун операциясини ўтказган 31 ёшли фуқаро вафот этди.

«Миллар» дастурида маълум қилинишича, эркак соат 11:30 лар атрофида операция хонасига олиб кетилган ва кейинчалик унинг амалиёт пайтида вафот этгани маълум бўлган. Оила аъзоларининг таъкидлашича, уларга воқеа ҳақида бир неча соатдан кейин хабар берилган ва беморнинг юраги операциядан олдин тўсатдан тўхтаб қолганини тушунтиришган.

Бироқ, оила бунга наркознинг ҳаддан ташқари кўп берилиши сабаб бўлганини айтмоқда.

Марҳумнинг турмуш ўртоғи ҳам текширув натижаларини кардиологга Telegram орқали юборганини ва беморнинг юраги соғлом экани ҳамда унга қарши кўрсатма йўқлиги ҳақида тасдиқнома олганини бироқ, кейинчалик ёзишмалар ўчириб ташланганини айтади.

Дастлабки тиббий хулосага кўра, беморда анафилактик шок ва номаълум сабабга кўра юрак тўхташи қайд этилган. 

Бош прокуратура матбуот хизмати 29 ноябрь куни хусусий клиника шифокорларига нисбатан Жиноят кодексининг 116-моддаси (Касб юзасидан ўз вазифаларини лозим даражада бажармаслик) билан жиноят иши қўзғатилганини маълум қилди.

Шунингдек, Олмазор тумани санитария-эпидемиологик осойишталик ва жамоат саломатлиги хизмати бўлимининг тегишли қарорига асосан хусусий клиника фаолияти расман тўхтатилган.   

«Тергов ҳаракатлари ҳар томонлама, тўлиқ ва холисона ўтказилиши ва натижаси бўйича қонуний қарор қабул қилиниши таъминланади», – дейилади расмий ахборотда.      

Эслатиб ўтамиз, хусусий клиникалар билан боғлиқ айни ҳолатлар аввал ҳам (1, 2, 3) содир бўлгани ва тегишли тартибда жиноят ишлари очилгани хабар қилинган эди.