2026 йил 1 июлдан Ўзбекистонда вақтинча меҳнатга лаёқатсизлик, яъни касаллик нафақаларини тўлашнинг янги тартиби амалга киритилади. Бу ҳақда Ижтимоий ҳимоя миллий агентлиги матбуот хизмати маълум қилди.

Янги тизимга кўра, касалликнинг дастлабки 5 куни учун нафақани иш берувчи тўлайди. Олтинчи кундан бошлаб эса тўловлар Давлат ижтимоий суғурта жамғармаси маблағлари ҳисобидан амалга оширилади. Илгари касаллик нафақаси тўлиқ иш берувчи зиммасида эди.

Нафақа миқдори фуқаронинг суғурта стажига қараб белгиланади. Суғурта стажи 6 ойдан 8 йилгача бўлганларга ўртача иш ҳақининг 60 фоизи, 8 йилдан ортиқ стажга эга бўлганларга эса 80 фоизи тўланади.

I ва II гуруҳ ногиронлиги бўлган шахслар, тўрт ва ундан ортиқ фарзанди бор оилалар ҳамда ногиронлиги бўлган фарзандни тарбиялаётган фуқаролар учун нафақа миқдори қўшимча 20 фоизга оширилади.

Янги тартибда болаларни парвариш қилиш учун ҳам қўшимча кафолатлар жорий этилмоқда. Хусусан, 14 ёшгача бўлган болани парвариш қилиш учун қўшимча 20 календарь кун, 16 ёшгача ногиронлиги бўлган болани парвариш қилиш учун эса қўшимча 40 календарь кунгача нафақа тўланади.

Тизим тўлиқ рақамлаштирилади. Фуқаролардан ариза ёки қўшимча ҳужжат талаб этилмайди. Электрон меҳнатга лаёқатсизлик варақаси расмийлаштирилгач, маълумотлар автоматик текширилиб, нафақа проактив тарзда тайинланади.

Тўловлар «Baraka» тизими орқали амалга оширилади. Ҳар бир фуқаро учун виртуал карта автоматик очилади ва маблағлар шу картага ўтказилади.

Янги тартиб давлат ва хусусий секторда расмий меҳнат қилаётган, камида 6 ойлик суғурта стажига эга бўлган барча фуқароларга татбиқ этилади.