Самарқанд шаҳрида Осиё тараққиёт банки Бошқарувчилар кенгашининг 59-йиллик йиғилиши доирасида бўлиб ўтган учрашувлар Ўзбекистоннинг халқаро иқтисодий майдондаги мавқеи тобора мустаҳкамланаётганини яна бир бор намоён қилди.

Айниқса, Саудия Арабистонининг “ACWA Power” компанияси раҳбари Муҳаммад Абунайяннинг фикрлари мамлакатда амалга оширилаётган ислоҳотлар ва инвестицион муҳитга ташқи баҳони акс эттиради.

Муҳаммад Абунайян Ўзбекистонни ўз юртидек яқин ҳис қилишини таъкидлаб, мамлакат раҳбарияти томонидан инвесторларга кўрсатилаётган юқори эътибор ва амалий қўллаб-қувватлашни алоҳида қайд этди. Унинг сўзларига кўра, Президент даражасида ҳар бир лойиҳанинг бориши шахсан назорат қилинаётгани, жараёнларни тезлаштиришга хизмат қилмоқда. Бу эса сармояларнинг самарали амалга ошиши учун мустаҳкам замин яратмоқда.

Яшил энергетика – стратегик устуворлик

Суҳбатда Ўзбекистоннинг энергетика сиёсатига алоҳида урғу берилди. Қайд этилишича, мамлакат қайта тикланадиган энергия манбаларини ривожлантиришга эрта босқичда киришган ва бугун бу йўналишда аниқ стратегия шаклланган.

Мутахассислар фикрича, бу фақат технология эмас, балки иқтисодий ва ижтимоий самарадорликни ҳам ҳисобга олган ёндашувдир. Натижада Ўзбекистон нафақат ўз эҳтиёжларини таъминлаётган, балки минтақада энергетик барқарорликни таъминловчи марказга айланмоқда.

Инвестициялар оқими: ишонч ва натижа

Сўнгги йилларда Ўзбекистонга хорижий инвестициялар оқими кескин ошгани алоҳида таъкидланди. Илгари инвесторлар кам келган бўлса, ҳозир дунёнинг турли бурчакларидан йирик ва сифатли сармоядорлар мамлакатга кириб келмоқда.

Бу, аввало, қонун устуворлиги, шаффофлик ва институционал ислоҳотлар натижаси сифатида баҳоланмоқда. Муҳаммад Абунайян таъкидлаганидек, Ўзбекистон “келиб-кетадиган” эмас, балки узоқ муддатли ва масъулиятли инвесторларни танлаш сиёсатини олиб бормоқда.

30 миллиард долларлик янги босқич

Маълум қилинишича, Саудия Арабистони инвестициялари ҳажми аллақачон 26 миллиард доллардан ошган. Яқин истиқболда бу кўрсаткични 30 миллиард доллардан юқорига чиқариш режалаштирилмоқда.

Бу сармоялар энергетика, инфратузилма, тиббиёт, сув таъминоти, туризм ва ишлаб чиқариш каби стратегик соҳаларни қамраб олмоқда. Шу орқали Ўзбекистон нафақат ички бозор, балки минтақавий иқтисодий марказ сифатида шаклланмоқда.

Инсон капитали ва стратегик етакчилик

Таҳлилчиларга кўра, Ўзбекистондаги ўзгаришларнинг асосий омили — инсон капиталига эътибор ва стратегик бошқарувдир. Ёшларни замонавий билимлар билан таъминлаш, маҳаллий кадрларни тайёрлаш ва уларни йирик лойиҳаларга жалб қилиш узоқ муддатли ўсишни таъминлайди.

Муҳаммад Абунайян бу жараёнларни шахсан Президент Шавкат Мирзиёевнинг қатъий сиёсати ва амалий ёндашуви билан боғлади. Унинг таъкидлашича, Ўзбекистон бугун дунёдаги энг тез трансформация қилинаётган давлатлардан бирига айланган.

Глобал ноаниқликлар, геосиёсий зиддиятлар ва иқтисодий хавфлар кучайган бир шароитда Ўзбекистон барқарор ўсиш ва инвестициялар учун жозибадор майдон сифатида шаклланмоқда.

Яшил энергетика, институционал ислоҳотлар ва очиқ инвестиция сиёсати мамлакатни нафақат Марказий Осиёда, балки халқаро миқёсда ҳам муҳим иқтисодий марказга айлантиришга хизмат қилмоқда.

Манба