Жиноят ишлари бўйича Қамаши туман судида Қашқадарё вилоятида туғилган 40 ёшли Р.И.га нисбатан «ёлланиш» айблови билан қўзғатилган жиноят иши кўриб чиқилди.

Суд терговида аниқланишича, Р.И. 2015 йилда Россия фуқароси билан турмуш қурган ва шу сабаб Россия фуқаролигини олган. Икки фуқароликка эга бўлган фуқаро 2023 йилдан бери Россия Федерацияси миграция идораларига хорижга чиқиш паспортини олиш учун бир неча бор мурожаат қилиб келган. Бироқ, 2025 йил март ойида миграция хизмати ходимлари унга хорижга чиқиш паспортини олиш учун ҳарбий рўйхатдан ўтиш кераклигини тушунтирган.

Р.И. судда соғлиғи ёмонлиги ва жанговар ҳаракатларда иштирок этишни истамаслигига қарамай, у Приморе ўлкаси ҳудудида жойлашган ҳарбий қисмга мажбуран юборилганини билдирган.

У ўзини Украина ҳудудидаги жанговар ҳаракатларда иштирок этиш учун юбориш режалаштирилаётганини англаб, бўлинма қўмондонига чурраси борлигини айтади. У ҳарбий госпиталга юборилади ва у ерда операция ўтказилади.

Шундан сўнг у ўзбошимчалик билан госпитални тарк этиб, ҳарбий қисмга қайтмаган ва 9 июль куни Ўзбекистонга қайтган. Р.И. ўз ихтиёри билан ДХХнинг Қашқадарё вилояти бўйича бошқармасига пушаймонлиги тўғрисида ариза билан мурожаат қилиб, содир этган жинояти ҳақида маълум қилган ҳамда Россия ва Украина ўртасидаги ҳарбий ҳаракатларда иштирок этганлигини тасдиқловчи ҳужжатларни тақдим этган.

Суд уни ЖКнинг 154-моддаси 1-қисмида (ёлланиш) назарда тутилган жиноятни содир этганликда айбдор деб топди. Унга 4 йил озодликни чеклаш жазоси тайинланди. Бунда Р.И.нинг озодликни чеклаш жазосини ўташ даврида унинг ишлаш ёки ўқиш вақтидан, шунингдек иш ёки ўқиш жойигача бориши ва уй-жойига қайтиб келиши учун зарур бўлган вақтдан ташқари қолган вақтда уй-жойидан чиқиши чекланди.

Судда, шунингдек, Р.И.нинг 2023 йилда ўзи яшайдиган Шаҳрисабз туманида Ж.Г. билан турмуш қургани ва уларнинг бир нафар вояга етмаган қизи борлиги айтилади.