Жиноят ишлари бўйича Фарғона шаҳар суди Россия Қуролли кучлари таркибида Украинадаги ҳарбий ҳаракатларда қатнашиш учун ёлланган Ўзбекистон фуқаросига нисбатан ҳукм чиқарди.

Кўрилган ишда 2002 йилда туғилган Ф.Қ. Жиноят кодексининг 154-моддаси 1-қисми — ёлланиш жиноятини содир этганликда айбдор деб топилган.

Суд ҳужжатларига кўра, Ф.Қ. 2020 йилда ишлаш мақсадида Россияга кетган. 2025 йил сентябрида эса Россия Мудофаа вазирлигига қарашли Донецк вилоятидаги ҳарбий қисмга ҳарбий хизматчи сифатида ёлланган. У ерда қуролдан ўқ отиш, граната улоқтириш ва биринчи тиббий ёрдам кўрсатиш бўйича ҳарбий ҳамда жисмоний тайёргарликдан ўтган.

Судланувчининг кўрсатувига кўра, у Россияда жазони ижро этиш муассасасида бўлган пайтида ҳужжат имзолаган ва кейин Россия Қуролли кучлари таркибида Украинага қарши урушда қатнашиш учун ёлланганини билган. Донецкда ҳарбий тайёргарликдан ўтганидан кейин соғлиғи билан боғлиқ муаммо сабаб госпиталга юборилган. У госпиталдан чиқиб, Ўзбекистон консуллик муассасасига мурожаат қилган ва кейин мамлакатга қайтган.

Тергов ва суд жараёнида унинг телефонидаги Instagram ёзишмалари ҳам далил сифатида ўрганилган. Унда ҳарбий кийимда ва қурол билан тушган суратлар бошқа шахсга юборилгани қайд этилган.

Суд Ф.Қ.нинг ҳаракатларини ЖК 154-моддаси 1-қисми бўйича тўғри квалификация қилинган деб топган. Ҳукмда у шахсий манфаатни кўзлаб, Украина ҳудудидаги жанговар ҳаракатларда иштирок этиш учун ҳарбий тайёргарликдан ўтгани ва Россия Қуролли кучларига хизматга киргани қайд этилган.

Суд унинг қилмишидан пушаймонлиги ва муқаддам судланмаганини жазони енгиллаштирувчи ҳолатлар сифатида баҳолаган. Шу билан бирга, жиноят ғаразли ва паст ниятларда содир этилгани оғирлаштирувчи ҳолат деб топилган.

Суд ЖКнинг 57-моддасини қўллаб, модда санкциясида назарда тутилмаган енгилроқ жазо — 5 йил озодликни чеклаш жазосини тайинлаган.

Ҳукмга кўра, маҳкум иш вақти ва ишга бориб-келиш учун зарур бўлган вақтдан ташқари яшаш жойидан чиқиши чекланади. Шунингдек, пробация органининг розилигисиз яшаш жойини ўзгартириши ва Фарғона вилояти ҳудудидан ташқарига чиқиши тақиқланган.

Ҳукм устидан белгиланган тартибда апелляция ёки кассация шикояти бериш мумкин.