АҚШ ҳукумати визасиз кириш дастури (Visa Waiver Program) татбиқ этилаётган давлат вакилларига нисбатан янги амалиётни жорий этмоқда. Бунга кўра, 42 давлат, жумладан, Буюк Британия, Франция, Германия, Жанубий Корея каби мамлакатлар фуқароларининг ижтимоий тармоқлардаги сўнгги беш йиллик фаолияти текширилади.

АҚШ божхона-чегара хизмати таклиф этаётган чора-тадбирлар лойиҳасида ана шундай талаб илгари сурилган.

Ушбу лойиҳа тасдиқланса, АҚШга кириш учун электрон рухсат сўраб мурожаат қилаётганлар ижтимоий тармоқлардаги сўнгги беш йиллик барча аккаунтлари, телефон рақамлари, охирги 10 йилдаги электрон почталари, шунингдек, оила аъзоларига оид маълумотларни тақдим этиши лозим бўлади.

USA Today нашри ёзишича, янги тартиб президент Доналд Трамп жорий йил январ ойида имзолаган электрон авторизация тизими орқали Қўшма Штатларга кираётган шахсларни текширишга оид 14161-сонли фармон асосида амалга татбиқ этилмоқда.

Айни пайтда 42 давлат фуқаролари визасиз кириш дастури доирасида АҚШ ҳудудида 90 кунгача визасиз юриши мумкин. 2 йиллик рухсатнома учун ҳозирга қадар фақат алоқа учун маълумотлар талаб қилинган, холос. 

Сўнгги вақтларда президент Трамп маъмурияти виза тартибини мураккаблаштирмоқда.

Жорий йил май ойида Оқ уй АҚШда ўқиш учун ариза топширган барча хорижлик талабалар ижтимоий тармоқларда текширувдан ўтишини маълум қилди. Вашингтон мазкур мажбурий текширувга тайёргарлик кўриш учун дунё бўйлаб АҚШ элчихоналарига талаба визаси учун янги суҳбатларни режалаштиришни тўхтатишни буюрган.

Трамп маъмурият жорий йил 4 июн куни Афғонистон, Чад, Конго, Экватор Гвинеяси, Гаити, Сомали, Эрон каби 12 давлат фуқароларига АҚШга кириш эшигини ёпган бўлса, орадан икки ҳафта ўтиб, Қўшма Штатларга кириши тақиқланган мамлакатлар рўйхатига яна 36 давлат қўшилиши хабар қилинди.

Август ойида АҚШ ҳукумати тижорат юк машиналари ва олис йўналишга қатновчи хорижлик ҳайдовчиларга ишчи визаларини беришни тўхтатди. Давлат котиби Марко Рубио ушбу қарорни изоҳларкан, чет эллик ҳайдовчилар америкалик ҳамкасбларининг “нонини яримта қилаётгани”ни айтган.

Сентяб ойида АҚШ ҳукумати хориж фуқароларига ноиммиграцион визалар, жумладан, B1/B2 сайёҳлик визаларини бериш тартибини қаттиқлаштирди. Давлат департаменти огоҳлантиришича, эндиликда талабгорлар виза учун аризани фуқаролик ёки доимий яшаш ҳуқуқига эга мамлакатида топшириши лозим.

Ноябр ойида эса Вашингтон виза сўрови учун рад этиш сабаблари рўйхатини кенгайтирди. Эндиликда онкология ва юрак касалликлари, диабет, семизлик учун ҳам виза аризаси рад этилиши мумкин.