Денгиз ва чучук сув балиқларига қирон келтирувчи вирус инсонга ҳам юқиши ва кўзнинг оғир патологияларини қўзғатиши мумкин. Хитой олимлари ўтказган тадқиқот натижалари Nature Microbiology журналида эълон қилинди.

Мутахассислар вирусли олд увеит билан кечувчи давомий кўз гипертензиясидан (POH-VAU) азият чекаётган 70 нафар беморнинг тўқималарида CMNV инфекцияси изларини топишди. Сичқонларда ўтказилган лаборатория тажрибалари патоген кўз ички босимини ошириши ва кўриш аъзоларининг таркибий шикастланишига олиб келиши мумкинлигини кўрсатди. Касаллик сут эмизувчиларга ҳам юқиши мумкин.

Вирус инсонга юқишининг асосий йўли (ҳолатларнинг 71,4 фоизи) сув жониворларига ишлов бериш вақтида ҳимоя воситаларидан фойдаланмаслик, шунингдек, денгиз маҳсулотларини хомлигича истеъмол қилишдир.

CMNV нодавируси 120 дан ортиқ балиқ турида аниқланган бўлиб, ўлимга олиб келувчи вирусли нерв касаллигини қўзғатувчи жиддий патоген ҳисобланади. У асосан личинка ва чавоқларнинг нерв тизимига ҳужум қилади ва кўпинча уларнинг батамом қирилиб кетишига сабаб бўлади.