АҚШ Сенатининг Халқаро ишлар бўйича қўмитаси раиси Жеймс Риш ушбу ҳафта АҚШ Конгрессига Марказий Осиё давлатлари, жумладан, Ўзбекистонга нисбатан «Жексон-Вэник тузатиши»ни бекор қилиш тўғрисидаги қонун лойиҳасини тақдим этишини маълум қилди. 

У, жумладан, ташаббус «C5+1» платформасининг ўн йиллигида тақдим этилгани ва «мамлакатларимиз ўртасидаги ҳамкорликнинг янги, жадал даврини» очишга қаратилгани рамзий маънога эга эканини таъкидлаган.

Журналист Азиза Қурбонова ҳам Шавкат Мирзиёев ва Дональд Трамп иштирокидаги саммит доирасида Оқ уйда бўлиб ўтган тадбирда бу ҳақда АҚШ Сенатининг Халқаро ишлар бўйича қўмитаси раиси Жеймс Ришдан муносабат олганини ёзди.

«Жексон-Вэник тузатиши»ни бекор қилиш вақти аллақачон келган. Президентнинг ёрдами билан, у билан ҳамкорликда биз бу қарорни жуда яқин орада бекор қиламиз», – дейди Жеймс Риш.

Маълумот учун, Собиқ Иттифоққа жазо сифатида киритилган ва ҳанузгача Ўзбекистон билан савдо алоқаларига техник тўсиқ сифатида сақланиб қолган «Жексон-Вэник тузатиши» — 1974 йилда АҚШ Савдо тўғрисидаги қонунига киритилган тузатишлар бўлиб, улар эмиграцияга (кўчиш) тўсиқ қўювчи ва бошқа инсон ҳуқуқларини бузувчи давлатлар билан савдони чегаралашни кўзда тутади. Ҳужжат уни таклиф қилган конгрессменлар Генри Жексон ва Чарльз Веник шарафига номланган.

«1991 йилда СССР парчалангач, янги мустақил республикалар — Ўзбекистон, Қозоғистон, Тожикистон ва Туркманистон — ҳуқуқий жиҳатдан собиқ «социалистик давлатлар» рўйхатида қолиб кетди. Натижада, Жексон–Веник тузатмаси автоматик тарзда бу мамлакатларга ҳам татбиқ этилди. Бу «де юре» чеклов ҳозир фақат техник тўсиқдек туюлса-да, қатор ноқулайликлари бор: АҚШ Конгресси минтақамиз давлатларига тўлиқ савдо имтиёзларини беришни ҳар йили қайта кўриб чиқишига тўғри келади. Савдо битимлари ва инвестицион шартномаларни ратификация қилишда бюрократик кечикишлар юзага келади», – деб ёзади Қурбонова.