Россия Адлия вазирлиги сиёсатчи Борис Надеждинни хорижий агентлар реестрига қўшди. Бу ҳақда вазирлик веб-сайтида хабар берилди.

«Надеждин хорижий агентлар томонидан кенг жамоатчиликка хабарлар ва материаллар яратиш ва тарқатишда, шунингдек, Россия Федерациясида фаолияти номақбул деб топилган хорижий ва халқаро ташкилотлар рўйхатига киритилган ташкилот томонидан хабарлар ва материаллар тайёрлашда иштирок этган», дейилади нашрда.

Шунингдек, сиёсатчи Россия давлат ҳокимияти органлари томонидан қабул қилинган қарорлар ва федерал сайлов тизими ҳақида ёлғон маълумот тарқатгани иддао қилинади. Бундан ташқари, Адлия вазирлигининг аниқлик киритишича, Надеждин рухсатсиз митинглар ва пикетларда иштирок этишга чақирган.

Тошкентда туғилган Надеждин 2024 йилги Россия президентлик сайловларида иштирок этишни режалаштирган, аммо Марказий сайлов комиссияси унинг номзодини рўйхатдан ўтказишдан бош тортган. Бунга сиёсатчини қўллаб-қувватловчи сайловчилар имзоларининг етарли эмаслиги сабаб бўлган. Надеждин 100 000 дан кам имзо топшира олди, қонуний талаб эса камида 300 000 тани ташкил этади. У номзодлар ичида Украина урушига қарши гапирган ва уни тўхтатишга ваъда берган ягона сиёсатчи эди.