АҚШ президенти Доналд Трамп 30 сентябрь куни Виржиния штатидаги Куантико ҳарбий базасида армия генераллари ва қўмондонлар қаршисида сўзлаган маърузасида Россия хусусида таҳдидомуз баёнотлар берди.

Трамп ўз нутқида Россия собиқ президенти, РФ Хавфсизлик кенгаши котибининг ўринбосари Дмитрий Медведевни аҳмоқ деб атаган ва унинг ядро қуролига оид масъулиятсизларча баёнотлари сабаб Россия соҳилларига атом сувости кемаларини юборганини айтган.

“Яқинда Россия бизга енгилгина таҳдид қилди. Бунга жавобан мен атом сувости кемаларини юбордим. Мен “ядро” сўзи эслангани сабаб шундай йўл тутдим. Бу – Путин жамоасида ишлайдиган аҳмоқ одам. Мен Россия соҳилига бир-икки сувости кемасини юбордим. Эҳтиёткорлик важидан. Биз одамлар бу сўзни (ядро қуроли назарда тутилмоқда – таҳр.) хўжасизларча фойдаланишига йўл қўя олмаймиз”, – деган Трамп.

Сиёсатчи сувости кемалари бўйича АҚШ Россия ва Хитойдан 25 йил олдинда эканини қайд этар экан, гарчи ҳеч қачон қўллашга зарурат бўлмаслигини истаса ҳам, ядро арсеналини модернизация қилиш лозимлигини таъкидлаган.

Эслатиб ўтамиз, АҚШнинг амалдаги ва Россиянинг истеъфодаги президентлари Трамп ва Медведев кўпдан буён ижтимоий тармоқларда даҳанаки тортишувлар қилиб келмоқда.

Медведев 22 июнь куни Телеграмдаги саҳифасида дунёнинг бир қатор мамлакатлари Эронга жанговар ядро комплектларини беришга тайёр экани ҳақида шов-шувли пост қолдирганди.

Трамп бунга жавобан ядро қуроли масаласида ўта эҳтиёткор бўлиш лозимлигини уқтирган, АҚШ атом сувости кемалари, жумладан, “дунёдаги энг кучли ва ажалвор қурол”га эга эканини писанда қилган эди.

Трамп ҳарбий қўмондонлар ҳузуридаги маърузасида Россия президенти Владимир Путиндан кўнгли қолганини яна бир карра урғулаган.

“Путиндан жуда ҳафсалам пир бўлди. У бу масалага (Украина уруши назарда тутилмоқда – таҳр.) тез ва соз киришади деб ўйлагандим. У урушни бир ҳафтада якунлаши керак эди. Мен Путинга “Кўринишинг ёмон. Бир ҳафта давом этиши лозим бўлган урушни 4 йилдан буён давом эттирмоқдасан. Нима сен, қоғоздан ясалган йўлбарсмисан?” дедим”, – деган АҚШ президенти.

Сўнгги вақтларда Украинадаги урушни тўхтатиш борасида катта ваъдалар берган Трамп Путинни музокара орқали муроса йўлига сола олмаслигига кўзи етгани айтилмоқда.

Президентлик сайлови даврида Россия – Украина урушини 24 соат ичида тугатишга ваъда берган Трамп Оқ уйга келганидан буён Путин билан бир неча бор телефонда суҳбатлашди.

Бунга ҳам қаноат қилмаган республикачи сиёсатчи жорий йил 15 август куни Путин билан Аляска штатида учрашди. Икки давлат раҳбари иштирокидаги қарийб 3 соатлик музокара амалий натижасиз якунланди. Украинада ўт очишни тўхтатиш борасида жиллақурса муваққат келишувга ҳам эришилмади.

Трамп россиялик ҳамкасби билан музокарани ижобий баҳолади. У ҳатто Fox News телеканалига берган интервьюсида Путин билан учрашувга 10 баллик тизимда 10 балл қўйишини айтиб мақтанди. Аммо аксар таҳлилчилар Аляскадаги учрашув амалий натижа бермагани ҳолда Путинга катта очко келтирди деб ҳисоблайди. Умуман, Аляска саммити Оқ уйнинг мағлубияти, Кремлнинг ғалабаси ўлароқ талқин қилинди.

Трампнинг “Путин ақлдан озибди!”, “Путиндан ҳафсалам пир бўлди” қабилидаги ёзғиришлари эса Россия раҳбарига таъсир этмаётгани айтилмоқда.

Дарвоқе, 30 сентябрь куни Виржиния штатидаги Куантико ҳарбий базасида ташкил этилган учрашувда Трамп одатдагидек ўз президентлик даврида эришилган ютуқлар ҳақида тўлиб-тошиб гапирган. Дунёдаги еттита урушни тўхтатганини яна бир карра таъкидлаб, унга Нобель мукофотини бермаслик АҚШга нисбатан “ўтакетган ҳурматсизлик” бўлишини айтган.

Йиғилишда АҚШ мудофаа вазири Пит Ҳегсет ҳам маъруза қилган. AP агентлиги хабар беришича, мудофаа вазири АҚШ миллий хавфсизлигига оид муҳим хатарлар қаторида армияда гендер муаммоларига алоҳида эътибор қаратган.