АҚШ президенти қароргоҳи – Оқ уй ҳудудида 2026 йилнинг 14 июнь куни мутлақ жангчилик чемпионати (UFC) беллашуви ташкил этилади. Бу ҳақда президент Доналд Трамп АҚШ ҳарбий денгиз кучларининг 250 йиллиги муносабати билан Норфолк шаҳрида ташкил этилган маросимда маълум қилган.

Мусобақа учун 14 июнь санаси танлангани бежиз эмас. Умр вафо қилса, Трамп айни ўша куни 80 ёшга тўлади.

Трамп ўз маърузасида иккинчилик муддат президентлик даврида АҚШда мамлакатнинг 250 йиллиги, 2026 йилда футбол бўйича жаҳон чемпионати, 2028 йилда ёзги Олимпиада ўйинлари ўтишини таъкидлаган.

Хабарларга кўра, Оқ уйнинг жанубий қисмидаги майсазорда UFC жанги учун октагон қурилади. Беллашув доирасида мушакбозлик ва чироқлар шоуси ўтказилиши ҳам режалаштирилган.

Трамп Оқ уй ҳудудида UFC жанги уюштирилишини жорий йил июль ойида маълум қилган эди. Трампга кўра, гап 20-25 минг томошабин гувоҳлигида ўтадиган росмона жанг ҳақида кетмоқда.

Аввалроқ икки вазн тоифасида UFC чемпиони Конор Макгрегор Оқ уй ҳудудида ташкил этиладиган беллашувда америкалик Майк Чендлерга қарши октагонга чиқишини айтган эди.

Аралаш яккакурашларнинг мухлиси бўлган Доналд Трамп апрель ойида Майамида ўтказилган UFC мусобақасида ташриф буюрган эди. Бунга қадар АҚШнинг бирор бир президенти UFC беллашувларига бормаган эди.

UFC бош директори, Трампнинг дўсти ва ҳомийси Дэйна Уайт Оқ уй ҳудудидаги жангга ҳозирлик кўрилаётганини айтган.

Трамп маъмурияти мулозимлари АҚШнинг 250 йиллиги ва президентнинг 80 йиллик юбилейи шарафига ташкил этиладиган мусобақа “тарихдаги энг улуғ тарихий спорт ҳодисаси” бўлишини айтмоқда.

Трамп 2025 йил январь ойида президентликка киришганидан кейин Оқ уй мажмуасида бир қатор ўзгаришлар қилди. Хусусан, президент ўтирадиган асосий хона (Овал кабинет) тилла нақшлар билан безатилди.

Оқ уйда спорт мусобақаси ўтказиш ғоясини АҚШ жамоатчилиги бирдек қўллаб-қувватлаяпти деб бўлмайди. Мухолифлар буни дунё сиёсати маркази ҳисобланиб келган ва вазминлик тимсоли бўлган Оқ уйнинг шаънини тушириш деб ҳам баҳоламоқда.