Хитойнинг электромобиллар гиганти BYD компанияси глобал автосаноатда кутилмаган ва тарихий қадам ташлади. Эндиликда компания ўз автомобилларидаги автопилот тизими айби билан содир бўлган ҳар қандай йўл-транспорт ҳодисаси (ЙТҲ) учун тўлиқ молиявий жавобгарликни ўз зиммасига олади.

Бу янгилик шунчаки маркетинг эмас, балки сунъий интеллект ва автоном бошқарув технологияларига бўлган улкан ишонч ифодасидир. Шунингдек, BYD томонидан эълон қилинган кафолат дастури нафақат автомобил эгаларини, балки жамият хавфсизлигини ҳам қамраб олади.

ЙТҲ оқибатида бошқа транспорт воситалари, йўл белгилари ёки бошқа шахсларнинг мулкига етказилган барча моддий зарарлар қоплаб берилади. Агар ЙТҲ туфайли жабрланганлар бўлса, уларни даволаш ва реабилитация қилиш билан боғлиқ барча харажатлар компания томонидан тўланади.

Ушбу дастур фақат BYDнинг энг сўнгги авлод «Smart Driving» (ақлли бошқарув) тизимига эга электромобиллари учун бўлиб, кафолат автомобилни харид қилган ёки тизимни янгилаган кундан бошлаб биринчи бир йил давомида амал қилади.

Дунё бўйлаб автопилотлар борасидаги асосий баҳс — "машина хато қилса, ким жавобгар?" — саволига BYD биринчи бўлиб мардларча жавоб берди. Кўпчилик компаниялар бундай масъулиятдан қочиб, уни суғурта ёки ҳайдовчи зиммасига юклашга уринади.

BYDнинг бу қарори бутун автомобил саноати учун янги стандартни ўрнатмоқда. Агар Хитойда ўтказилаётган ушбу "эксперимент" ўзини оқласа, эртагаёқ бошқа йирик автомобил ишлаб чиқарувчилар ҳам шундай мажбуриятларни бўйнига олишга мажбур бўлишади. Бу эса ўз навбатида, йўллардаги хавфсизликни янада кучайтиради.

Эслатиб ўтамиз, ҳозирча ушбу кафолат фақат Хитой ҳудудида амал қилади. Бироқ компаниянинг жадал ривожланишини ҳисобга олсак, яқин келажакда бу тажриба халқаро миқёсга, хусусан, Ўзбекистон бозорига ҳам кириб келиши эҳтимоли йўқ эмас.