Davlat xavfsizlik xizmatining Buxoro viloyati bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamenti hamda Milliy gvardiyaning hududiy boshqarmalari bilan hamkorlikda o‘tkazilgan tezkor tadbirda simobfurushlar fosh qilindi.

Buxoro shahrida yashovchi shaxs (1998-y.t.) va Buxoro tumanida istiqomat qiluvchi fuqaro (1984-y.t.) o‘zaro til biriktirib, mamlakatimizda erkin sotilishi taqiqlangan, 3 dona flakondagi jami 343 gr simob moddasini 35 ming AQSh dollariga sotgan vaqtlarida ashyoviy dalillar bilan ushlangan.

Hozirda ularga nisbatan Jinoyat Kodeksining 185-1-moddasi 2-qismi “b”, “v” bandlari bilan jinoyat ishi qo‘zg‘atilib, tergov harakatlari olib borilmoqda, deyiladi xabarda.

Ogohlantirilishicha, simob va uni o‘z ichiga olgan birikmalarni erkin sotish, sotib olish, saqlash yoki undan maishiy sharoitda foydalanishga ruxsat berilmaydi. Shuningdek, u kuchli zaharlilik darajasiga ega bo‘lib, mamlakatimiz hududida erkin aylanishi taqiqlanadi.