O‘zbekistonda jismoniy shaxslar o‘rtasida mobil telefon raqami orqali bank hisobvarag‘idan to‘g‘ridan-to‘g‘ri pul o‘tkazish tartibi joriy etiladi.

Markaziy bank boshqaruvining tegishli qarori 14-avgust kuni qabul qilinib, 24-avgustda Adliya vazirligida 3930-son bilan davlat ro‘yxatidan o‘tkazildi. Hujjat rasmiy e’lon qilingan kundan uch oy o‘tgach kuchga kiradi.

Yangi tartib Markaziy bankning Tezkor to‘lovlar tizimi orqali amalga oshiriladi. Bunda fuqaro pul oluvchining karta raqami yoki bank hisobvarag‘i rekvizitlarini kiritishi shart bo‘lmaydi — uning bank hisobvarag‘iga bog‘langan mobil telefon raqami yetarli bo‘ladi.

Bank mobil ilovasi orqali telefon raqami asosida amalga oshiriladigan o‘tkazmalar sutkasiga 24 soat, haftasiga 7 kun uzluksiz ishlaydi.

Bankka shaxsan murojaat qilib amalga oshiriladigan o‘tkazmalar esa bankning ish kunlari va ish vaqtida bajariladi.

Barcha jarayonlar avtomatik ravishda real vaqt rejimida amalga oshirilishi belgilangan.

Xizmatdan foydalanish uchun mobil telefon raqami bank hisobvarag‘iga biriktiriladi.

Foydalanuvchi bir bank doirasida o‘z telefon raqamini faqat bitta bank hisobvarag‘iga bog‘lashi mumkin. Raqam muvaffaqiyatli bog‘langanidan so‘ng maxsus «bog‘lash kodi» ham shakllantiriladi.

Fuqaro istalgan vaqtda mobil ilova orqali yoki bankka murojaat qilib telefon raqamini hisobvaraqqa bog‘lashni bekor qilishi mumkin.

O‘tkazmani tasdiqlashdan oldin to‘lovchiga:

• o‘tkazilayotgan summa;
• pul oluvchining familiyasi, ismi va otasining ismi;
• pul tushadigan bank nomi;
• vositachilik haqi ko‘rsatiladi. Shundan keyin foydalanuvchi operatsiyani yakuniy tasdiqlaydi.

Agar telefon raqami bir nechta bankdagi hisobvaraqlarga bog‘langan bo‘lsa, tizim pul oluvchining qaysi bankda hisobvarag‘i borligini ko‘rsatadi va to‘lovchi kerakli bankni tanlaydi.

Hujjatning 12-sahifasida keltirilgan sxemaga ko‘ra, jarayon telefon raqamini kiritishdan boshlanib, oluvchining shaxsi va bankini tekshirish, bankni tanlash hamda to‘lovni tasdiqlashgacha bo‘lgan 9 bosqichda avtomatik amalga oshiriladi.

Shu tariqa, yangi tizim orqali fuqarolar o‘rtasida pul o‘tkazishda bank karta raqami o‘rniga mobil telefon raqamidan foydalanish imkoniyati paydo bo‘ladi.