Kanzasdagi Duayt Eyzenhauer nomidagi prezident kutubxonasi rahbari Todd Arrington iste’foga chiqarildi. CBS telekanali voqea Arrington Oq uy ma’muriyatiga AQShning 34-prezidenti qilichini topshirishdan bosh tortganidan so‘ng yuz berganiga e’tibor qaratdi.

CBS manbalariga ko‘ra, Londonga tashrifi chog‘i Tramp Britaniya qiroli Charlz III ga AQSh harbiy va davlat arbobi Eyzenhauerning qilichini sovg‘a qilmoqchi bo‘lgan.

Telekanalning tashrifda ishtirok etgan suhbatdoshlari Arringtonning iste’fosidan bexabar va ular Oq uyning bunga aloqadorligini rad etishmoqda. Eyzenhauerning kolleksiyasida bir nechta, jumladan, G‘alabaga qo‘shgan hissasi uchun 1947-yilda London merligi tomonidan berilgan faxriy qilich, Niderlandiya hukumatining faxriy qilichi va Vest-Poyntdagi harbiy akademiyaning zobitlik qilichi saqlanadi.

Charlz III va qirolicha Kamilla uchun sovg‘alarni birinchi xonim Melaniya Tramp shaxsan tanlagan, u AQSh va Buyuk Britaniya o‘rtasidagi alohida munosabatlar ramzi sifatida Eyzenhauer qilichini sovg‘a qilishni taklif qilgan.

Shundan so‘ng Davlat departamenti qilichning asl nusxasi saqlanayotgan Kanzasdagi prezident kutubxonasi bilan bog‘landi, ammo Arrington kutubxona fondiga topshirilgan muzey artefaktini topshirishdan bosh tortgan.