AQSh ma’muriyati Yaqin Sharqqa qo‘shimcha minglab harbiy kuchlarni jo‘natishga qaror qildi. Bu haqda rasmiy manbalarga tayanib The Washington Post xabar bermoqda.

Ma’lum qilinishicha, mintaqadagi kuchlar tarkibiga aviatashuvchilar, harbiy kemalar va dengiz piyodalari kiritilmoqda. Jumladan, «USS George H.W. Bush» aviatashuvchisida taxminan 6 ming nafar harbiy, shuningdek yana 4 mingdan ortiq dengiz piyodasi yaqin vaqtda hududga yetib kelishi kutilmoqda.

Qo‘shimcha kuchlar allaqachon mintaqada joylashgan harbiy kontingentga qo‘shiladi. Hozirda AQShning Eronga qarshi operatsiyalarida 50 mingga yaqin harbiy ishtirok etayotgani aytilmoqda.

Bu qadam Vashingtonning Eronga bosimni kuchaytirish siyosati doirasida amalga oshirilmoqda. AQSh prezidenti Donald Tramp avvalroq Eron portlariga nisbatan dengiz blokadasini e’lon qilgan va Tehronni Ho‘rmuz bo‘g‘ozini ochish hamda yadroviy dasturdan voz kechishga chaqirgan edi.

Shu bilan birga, muzokaralar hali to‘liq to‘xtab qolmagan. AQSh tomoni ular qayta tiklanishi mumkinligini bildirmoqda.

Ekspertlar fikricha, mintaqada harbiy kuchlarning ortishi AQShga qo‘shimcha variantlar beradi. Biroq muzokaralar muvaffaqiyatsiz yakunlansa, vaziyat yanada keskinlashishi mumkin.

Shu bilan birga, harbiy tahlilchilar ehtimoliy ssenariylar qatorida quruqlikdagi operatsiyalar ham ko‘rib chiqilayotganini ta’kidlamoqda. Bu esa mojaroning yanada kengayish xavfini oshiradi.