Ferrari компаниясининг электромобиллар қатордаги биринчи ва ҳозирча ягона модели — Ferrari Luce хайрия кимошди савдосида 40 миллион долларга сотилди. У аукционларда сотилган янги автомобиллар орасида рекорд нарх қайд этди.

Ferrari Luce эски моделнинг электр двигателига мослаштирилган варианти эмас, балки компания томонидан яратилган мутлақо янги модел ҳисобланади. Luce автомобилининг ташқи дизайнини Apple компаниясининг собиқ дизайнери, британиялик Жони Айв ишлаб чиққан. Электромобил ўзига хос оқ рангга эга.

Ушбу моделда компания Ferrari анъаналаридан икки жиҳат бўйича воз кечди. Биринчидан, суперкар электр двигатели билан жиҳозланган бўлса, иккинчидан, одатий Ferrari автомобилларидаги каби икки ёки тўрт ўринли эмас, балки беш ўринли қилиб ишлаб чиқилган.

Бу ўзгаришлар Luce 2026 йил май ойида тақдим этилганидан кейин танқидларга сабаб бўлди. Кўпчилик бундай янгиликлар Ferrari ўзига хослигини йўқотишига олиб келиши мумкинлигини таъкидлаган.

Шунга қарамай, Калифорнияда ўтказилган RM Sotheby’s ким ошди савдосида автомобил ўзининг одатдаги нархидан қарийб 35 баробар қимматроққа сотилди. Харидорнинг исми ошкор қилинмаган.

Маълум қилинишича, харид қилинган Ferrari Luce махсус буюртма асосида ишлаб чиқарилган бўлиб, ўзига хос безаклар ва интерернинг ноёб деталлари билан ажралиб туради.