Франция Миллий мажлиси бедаво хасталикларга чалинган беморларга ўзини ўлдириш учун махсус дори-дармон ичиш ҳуқуқини берувчи қонуни қабул қилди. Депутатларнинг 291 нафари қонунни қўллаб-қувватлаган бўлса, 241 нафари қарши овоз берган. 

Reuters агентлиги аниқлик киритишича, эвтаназия ҳақидаги ушбу қонун француз жамияти ҳамда парламентида кўп йиллардан буён кескин баҳс-мунозараларга сабаб бўлиб келмоқда эди. 

Эммануэль Макрон президентлик даврининг иккинчи муддатида эвтаназия ҳақидаги қонун қабул қилинишига ваъда берган, буни “ҳаёт билан видолашувнинг французча модели” деб атаган эди.

Қонун лойиҳаси ҳатто ҳукуматнинг ўзида ҳам эътироф ва эътироз уйғотган.

Асосан муҳофазакор қатлам жамланган Сенат эвтаназияга қарши овоз берган. Аммо мамлакат Конституциясига кўра сўнгги сўзни қуйи палата айтади.

Миллий мажлис маъқуллаган қонун лойиҳасини Конституциявий кенгаш кўриб чиқиши ва тузатишлар киритиши ҳам мумкин.

Жорий йил февраль ойида Ifop маркази ўтказган ижтимоий сўровда французларнинг 84 фоизи ихтиёрий ўлимни қонунийлаштиришни ёқлаган. Диний ташкилотлар, жумладан, католик черкови бунга қарши чиққан.

Қонунга мувофиқ, беморга ажал дориси қатъий шартларга кўра берилади. Франциянинг вояга етган фуқаролари ёки мамлакатда қонуний асосда яшовчи чет элликлар ушбу ҳуқуқдан фойдаланади. Эвтаназия амалиёти оғир ва бедаво хасталикка чалинган, бу билан боғлиқ муттасил жисмоний ва руҳий қийноқлар ҳис қилаётган беморларга татбиқ этилади.

2022 йилда франциялик машҳур актёр Ален Делон эвтаназия орқали ҳаёт билан видолашишга тайёрлигини эълон қилган эди.

Кейинроқ унинг оиласи бу хабарни рад этган. Актёр 2024 йилда 88 ёшида ўз уйида вафот этган.

Дунё бўйлаб саноқли давлатларда беморнинг ихтиёрий равишда ҳаёт билан видолашувига қонунан рухсат берилган. Айни пайтда Нидерландия, Бельгия, Швейцария, Люксембург, Канада, Колумбия, Янги Зеландия, Испания, Австралия ва АҚШнинг айрим штатларида “ўлим ҳуқуқи”ни қонунан амалга ошириш мумкин.

Нидерландия 2002 йилда дунёда илк бор эвтаназияга қонунан рухсат берган. Мамлакат қонунининг икки карра баҳсли жиҳати шундаки, ундан 12 ёшга тўлган бемор ҳам фойдаланиши мумкин.

2022 йилда Австрияда, 2023 йилда эса Португалияда бу ҳақдаги қонун кучга кирган.

Эвтаназия юнонча “eu” (яхши) ва “thanatos” (ўлим) сўзларидан ясалган бўлиб, “яхши ўлим” деган маънони билдиради. Бу замонавий жамиятнинг энг оғриқли ва баҳсли масалалари сирасига киради.

Кўп сонли олимлар эвтаназияни ўз жонига қасд қилиш ўлароқ танқидий баҳолайди ва унга қонуний рухсат берилишини қоралайди. Самовий динлар, хусусан, исломда ҳам Яратган омонат ўлароқ берган жон неъматига қасд қилиш гуноҳи кабира ҳисобланади.