Республикачи Ренди Файн АҚШ Конгрессига Гренландияни АҚШга қўшиб олиш тўғрисидаги қонун лойиҳасини киритди.

«Бугун конгрессмен Файн (Флориданинг 6-округидан) Гренландияни аннексия қилиш ва унга штат мақомини бериш тўғрисидаги қонун лойиҳасини тақдим этди», — дейилади у тарқатган баёнотда.

Файнга кўра, бу ҳудудга бўлган эҳтиёж ташқи таҳдид шароитида Вашингтоннинг Арктикадаги манфаатларини таъминлаш билан оқланади: Россия ва Хитой у ерда ўз иштирокини «тажовузкорона кенгайтирмоқда».

«Гренландия кимнинг назоратида бўлса, ўша Арктика денгиз йўлларини ва АҚШни ҳимоя қилувчи хавфсизлик архитектурасини назорат қилади. Америка бу келажакни қадриятларимиздан нафратланадиган ва хавфсизлигимизни шубҳа остига қўймоқчи бўлган режимлар қўлида қолдира олмайди», — дейилади Файннинг баёнотида.

Тегишли қонун қабул қилинган тақдирда, Доналд Трампга оролни аннексия қилиш ёки сотиб олиш учун зарур деб ҳисоблаган ҳар қандай ҳаракатларни амалга ошириш имконини беради. Қонун талабига кўра, Америка етакчиси бунинг учун зарур бўлган тузатишлар ҳақида конгрессга ҳисобот тақдим этиши керак бўлади.

Гренландия ҳудуди — 2 166 000 квадрат километр. Агар АҚШнинг 51-штатига айланса, ҳудуди энг катта штатга айланади. Солиштириш учун: АҚШнинг ҳудуди энг катта Аляска штати майдони — 1 723 000 квадрат километр.

Гренландия Дания қироллиги таркибига киради. 1953 йилгача Даниянинг мустамлакаси бўлган, 2009 йилда ўзини ўзи бошқариш ва ички сиёсатни белгилаш имконияти билан мухторият ҳуқуқини олган.