Украина қатор европалик иттифоқчилари билан маслаҳатлашувлардан сўнг АҚШ маъмуриятига Дональд Трамп таклиф қилган тинчлик режасига ўзининг расмий тузатиш ва изоҳларини юборди. Бу ҳақда аввал Axios, кейин эса «РБК-Украина» манбалари орқали маълум қилинди.

Маълумотларга кўра, Украина делегацияси бошлиғи — Миллий хавфсизлик ва мудофаа кенгаши котиби Рустем Умеров жавоб ҳужжатини президент Трампнинг маслаҳатчиси ва куёви Джаред Кушнерга йўллаган. Ҳужжатда Киевнинг позицияси, баҳсли масалалар бўйича таклифлар ва айрим моддаларга қўшимчамалар келтирилган.

Украина делегацияси ҳужжатни юборишдан аввал Британия, Франция ва Германия билан бир нечта раунд маслаҳатлар ўтказди. Шундан сўнг Киев қуйидаги икки асосий масала – Россия эгаллаб турган ҳудудлар масаласи ҳамда Запорожье АЭСнинг келгуси мақоми бўйича ўз таклифларини шакллантирган.

Бу иккала масала тинчлик келишувидаги энг мураккаб ва баҳсли нуқталар экани алоҳида таъкидланмоқда.

Владимир Зеленскийнинг кечки мурожаатида маълум қилишича, 20 банддан иборат тинчлик режаси асосида Киев ва Вашингтон ўртасида яна икки муҳим ҳужжат – АҚШнинг Украинага хавфсизлик кафолатлари ҳақидаги битим ҳамда Украинани тиклаш ва инвестициялар бўйича қўшма дастур тайёрланяпти.

Қўшимча қилинишича, 10 декабр куни Украина иқтисодиётини тиклаш бўйича биринчи йиғилиш ҳам бўлиб ўтган. Унга АҚШ томонидан Джаред Кушнер, АҚШ Молия вазири Скотт Бессент ва BlackRock раҳбари Ларри Финк иштирок этган.

Axios нашрининг ёзишича, 11 декабрда АҚШ ва Украина ҳарбий раҳбарлари онлайн форматда навбатдаги муҳокамаларни ўтказади. Уларнинг асосий мавзуси – Вашингтон таклиф этган тинчлик режаси бўлади.