Россия президенти Владимир Путин йирик компаниялар раҳбарларини Украинадаги ҳарбий кампанияни молиялаштириш учун “ихтиёрий” тарзда маблағ ажратишга даъват қилди.

The Bell нашри ушбу баёнотни Россия саноатчилари ва тадбиркорлари иттифоқи қурултойидан кейинги ёпиқ учрашувда янграганини айтади.

Расмий қисмда Путин глобал иқтисодиётдаги беқарорлик, Яқин Шарқдаги урушнинг логистика ва ишлаб чиқариш занжирларига таъсири ҳақида гапирган. У бизнесни давлат билан яқин ҳамкорлик қилишга чақирган ва нефть-газ соҳасидаги юқори даромадларни “бир марталик манфаат” сифатида сарфлаб юборишдан огоҳлантирган. Унинг фикрича, бу даромадлар узоқ давом этмаслиги мумкин.

Бироқ норасмий муҳокамаларда анча кескин сигналлар берилган. Манбаларга кўра, Кремл Украинадаги ҳарбий ҳаракатларни тўхтатиш ниятида эмас ва уларни давом эттириш режаси бор. Бу эса давлат бюджетига босим ортиб бораётган шароитда бизнесни молиявий иштирокка жалб қилиш заруратини кучайтирмоқда.

Учрашувда айрим тадбиркорлар дарҳол муносабат билдиргани ҳам қайд этилмоқда. Хусусан, миллиардер Сулеймон Керимов катта миқдорда маблағ ажратишга ваъда берган. Бу ҳолат бошқа йирик бизнес вакиллари учун ҳам сигнал сифатида қабул қилиниши мумкин.