Канзасдаги Дуайт Эйзенҳауэр номидаги президент кутубхонаси раҳбари Тодд Аррингтон истеъфога чиқарилди. CBS телеканали воқеа Аррингтон Оқ уй маъмуриятига АҚШнинг 34-президенти қиличини топширишдан бош тортганидан сўнг юз берганига эътибор қаратди.

CBS манбаларига кўра, Лондонга ташрифи чоғи Трамп Британия қироли Чарлз III га АҚШ ҳарбий ва давлат арбоби Эйзенҳауэрнинг қиличини совға қилмоқчи бўлган.

Телеканалнинг ташрифда иштирок этган суҳбатдошлари Аррингтоннинг истеъфосидан бехабар ва улар Оқ уйнинг бунга алоқадорлигини рад этишмоқда. Эйзенҳауэрнинг коллекциясида бир нечта, жумладан, Ғалабага қўшган ҳиссаси учун 1947 йилда Лондон мэрлиги томонидан берилган фахрий қилич, Нидерландия ҳукуматининг фахрий қиличи ва Вест-Пойнтдаги ҳарбий академиянинг зобитлик қиличи сақланади.

Чарлз III ва қиролича Камилла учун совғаларни биринчи хоним Мелания Трамп шахсан танлаган, у АҚШ ва Буюк Британия ўртасидаги алоҳида муносабатлар рамзи сифатида Эйзенҳауэр қиличини совға қилишни таклиф қилган.

Шундан сўнг Давлат департаменти қиличнинг асл нусхаси сақланаётган Канзасдаги президент кутубхонаси билан боғланди, аммо Аррингтон кутубхона фондига топширилган музей артефактини топширишдан бош тортган.