Венгрия Евроиттифоқнинг Россияга қарши 20-пакет санкцияларини блоклашини маълум қилди. Бу ҳақда 22 февраль куни мамлакат ташқи ишлар вазири Петер Сийярто баёнот берди.

Унинг сўзларига кўра, Брюсселда ўтадиган ЕИ Ташқи ишлар кенгаши йиғилишида янги санкциялар пакети қабул қилиниши режалаштирилган, аммо Венгрия бу қарорни қўллаб-қувватламайди.

«Украина «Дружба» нефть қувури орқали Венгрия ва Словакияга нефть транзитини тикламагунича, Киев учун муҳим бўлган қарорларни қабул қилишга рухсат бермаймиз», – деди Сийярто.

Еврокомиссия раиси Урсула фон дер Ляйен февраль бошида маълум қилганидек, янги пакет Россия нефть экспортига оид денгиз хизматларини тўлиқ тақиқлашни кўзда тутади. Санкциялар, жумладан, «Соя флоти» деб аталувчи 43 та танкерга чекловларни, музёрар кемалар ва суюлтирилган газ ташувчи танкерлар учун техник хизматларни тақиқлашни, аввал санкцияга тушмаган металл, кимёвий маҳсулотлар ва стратегик минераллар импортига тақиқни, Европа Иттифоқидан Россияга экспортга қўшимча чекловларни (резинадан тортиб тракторларгача) ҳамда яна 20 та Россия минтақавий банкини санкциялар рўйхатига киритишни қамраб олади.

Европа Иттифоқида санкциялар кучга кириши учун эса барча аъзо давлатлар розилиги талаб этилади.

18 февраль куни Сийярто Венгрия Украинага дизель ёқилғиси етказиб беришни ҳам тўхтатганини айтган эди. Унинг таъкидлашича, бу қарор нефть транзити тикланмагунча амал қилади. Шунингдек, Будапешт Еврокомиссия томонидан тасдиқланган Украинага 90 миллиард евро миқдоридаги кредит ажратилишини ҳам блоклаган.

Сийяртонинг фикрича, Киев нефть транзитини чеклаш орқали Венгрияга босим ўтказмоқда ва бу ҳаракат Брюссел ҳамда венгриялик мухолифат билан мувофиқлаштирилган.

Шу тариқа, Украина атрофидаги энергетика ва санкциялар масаласи ЕИ ичидаги келишмовчиликларни янада кучайтирмоқда.

Эслатиб ўтамиз, аввалроқ Словакия ва Венгрия раҳбарлари Россия нефтининг «Дружба» қувури орқали транзити тўхтатилгани ортидан Украинага электр энергияси етказиб беришни чеклаш ёки тўхтатиш масаласини кўриб чиқишларини маълум қилганди.