Жорий йил 27 декабрь куни Самарқанд вилояти Пайариқ туманидаги туғуруқхоналардан бири ҳудудидаги ҳожатхона чиқинди қутисига чақалоқ ташлаб кетилган. «Zamon.uz»нинг ёзишича, аёлнинг чақалоқни ташлаб кетгани кузатув камераларига тушиб қолган.

Маълум қилинишича, тиббиёт бирлашмасига қайнонаси билан келган аёл тиббий кўрикдан ўтишдан бош тортиб, қабзиятдан шикоят қилган ва клизма сўраб мурожаат қилган. Шифокор томонидан текширув ўтказиш ҳамда УТТ қилиш таклиф этилган, бироқ бемор бунга рози бўлмаган. Аёл 4 ойлик келин бўлган.

Шундан сўнг аёл муолажа хонасига йўналтирилган. Муолажа жараёнида у ҳамширадан уни ёлғиз қолдиришни сўраган. Орадан бироз вақт ўтгач, хонани текширган тиббиёт ходимлари челак ичида чақалоқ қолдириб кетилганини аниқлаган.

Аниқланишича, аёл муолажахонада туққан ва шундан сўнг тиббиёт муассасасини тарк этган. Ҳолат аниқлангач, шифохона маъмурияти кузатув камералари орқали аёлнинг шахсини аниқлаган ва ҳуқуқни муҳофаза қилувчи органларга хабар берган.

Самарқанд вилояти Ички ишлар бошқармаси ахборот хизмати маълумотига кўра, челак ичида топилган чақалоқ тўққиз ойлик, ўғил жинсли бўлган. Мазкур ҳолат юзасидан тегишли ҳужжатлар расмийлаштирилиб, судга оид тиббий экспертиза тайинланган.

Ҳозирда Пайариқ тумани Ички ишлар бўлими ҳузуридаги тергов бўлинмаси томонидан терговга қадар текширув ишлари олиб борилмоқда.