Пойтахтимизда маҳалла институти фаолиятини янада такомиллаштириш, ҳудудларни ободонлаштириш ҳамда аҳоли турмуш даражасини янги босқичга кўтаришга қаратилган кенгайтирилган йиғилиш бўлиб ўтди. Алишер Навоий номидаги киносарой мезбонлик қилган мазкур тадбирда қарийб 1 200 нафар масъул раҳбар ва соҳа вакиллари иштирок этди. Мамлакатимизда амалга оширилаётган ислоҳотларнинг марказида айнан маҳалла тургани, барча ўзгаришлар бевосита қуйи бўғиндан бошланиши кераклиги яна бир бор таъкидланган ушбу йиғилишда долзарб вазифалар белгилаб берилди.

Мазкур кенг кўламли тадбир шунчаки йиғилиш эмас, балки келгуси ойлар учун жиддий йўл харитаси бўлди. Унда Президент Администрацияси вакиллари, Тошкент шаҳар прокуратураси, Ички ишлар бош бошқармаси, Миллий гвардия, коммунал хизматлар, Бошқарув сервис компаниялари, Маҳалла уюшмаси мутасаддилари ҳамда пойтахтдаги барча маҳалла фуқаролар йиғинлари раислари жам бўлди. Ҳуқуқ-тартибот органлари, ижроия ҳокимияти ва жамоатчилик тузилмаларининг бир мақсад йўлида бирлашиши маҳаллалардаги муаммоларни тезкор ва манзилли ҳал этиш имконини беради.

Йиғилиш давомида ҳар бир маҳалланинг ички имкониятларидан келиб чиққан ҳолда стратегик вазифалар ижроси қатъий назоратга олинди. Хусусан, кўчалар, хонадонлар атрофи, ариқ ҳамда хиёбонларни тартибга келтириш, кўкаламзорлаштириш ишларини изчил ва жадал давом эттириш, маҳаллаларда мавжуд инфратузилма муаммоларини бартараф этишга қаратилган лойиҳаларни ишлаб чиқиш белгиланди. Бунда бевосита аҳолининг фикри ва фаол иштироки таъминланиши шартлиги кўрсатиб ўтилди. Шунингдек, ишсиз фуқароларни доимий ҳамда даромадли меҳнатга йўналтириш мақсадида маҳалла бандирлари билан тизимли ҳамкорликни йўлга қўйиш, коммунал хизматлар кўрсатиш сифатини тубдан яхшилаш ҳамда соҳадаги мавжуд дебитор қарздорликларни қисқартириш бўйича аниқ топшириқлар берилди.

Эълон қилинган мазкур чора-тадбирлар фақатгина мавсумий кампания эмас. Бу энг аввало маҳаллаларда соғлом ва обод муҳитни яратиш, аҳолининг куз-қиш мавсумига пухта тайёргарлик кўришини таъминлаш ҳамда ҳар бир фуқаронинг ҳаётдан рози бўлиб яшаши учун муносиб шароитлар яратишга қаратилган жиддий қадамдир. Қўйилган вазифаларнинг ўз вақтида ва сифатли ижроси пойтахт маҳаллаларининг қиёфасини кескин ўзгартириб, одамларнинг эртанги кунга бўлган ишончини янада мустаҳкамлаши шубҳасиз.