Ўзбекистон Савдо-саноат палатасида АҚШнинг Нью-Йорк шаҳри мэри Эрик Адамс бошчилигидаги делегация билан бўлиб ўтган учрашувда Тошкентда қўшма касб-ҳунар коллежини очиш таклиф этилди.

Учрашувда, шунингдек Палата раиси маслаҳатчиси Умид Сафаров томонидан ўзбекистонлик тадбиркорларни АҚШ капитал бозорларига тайёрлаш мақсадида Нью-Йорк фонд биржаси билан ҳамкорлик ўрнатиш, мамлакатимизда АҚШнинг етакчи университетлари билан бизнес мактаби ва акселерация дастурлари яратиш ҳам таклиф қилинди.

Кичик бизнес уюшмаси раиси Камолат Мирзаалиева эса Нью-Йорк кичик бизнес бирлашмаси билан ҳамкорлик ўрнатиш ва маҳаллий маҳсулотларни АҚШ бозорига экспорт қилишда кўмак сўради.

Тадбиркорлар томонидан қишлоқ хўжалиги маҳсулотларини Америка бозорига етказиб беришни кенгайтириш, биохимёвий маҳсулотлар ишлаб чиқариш ва инновацион лойиҳаларни ривожлантириш бўйича таклифлар билдирилди.

Бундан ташқари, учрашувда томонлар ўзаро савдо-иқтисодий ҳамкорликни янада чуқурлаштириш, қўшма кооперация лойиҳаларини ривожлантириш ва икки ҳудуд ўртасидаги бизнес алоқаларни кенгайтириш масалаларини муҳокама қилди.

Учрашув конструктив руҳда ўтиб, икки томонлама бизнес ҳамкорликни янги босқичга олиб чиқишга хизмат қилиши кутилмоқда.