Россия президенти Владимир Путин Қўшма Штатлар Россиянинг ЛУКОЙЛ ва Роснефт нефть компанияларига қарши санкциялар жорий этишини кутмаганини айтди.

Оқ Уйнинг қарори ўз-ўзидан қабул қилингвн, чунки Аляска музокараларидан бери Москва ва Вашингтон ўртасида ҳеч қандай низолар бўлмаган. Россия президенти буни Қирғизистонга сафари чоғида бўлиб ўтган матбуот анжуманида айтди. 

«Музокаралар давомида биз Қўшма Штатлар билан ҳарбий ҳаракатларга чек қўйиш учун нима қилиш кераклиги ҳақида ўзаро тушунишга эга эканлигимиз ҳақидаги таассуротни шакллантирдик. Биз Анкориж платформасида қолдик ва тўсатдан Қўшма Штатлар санкциялар эълон қилди. Мен нима бўлаётганини ҳам тушунмадим», деди Путин. 

Октябр ойида АҚШ Молия вазирлиги ЛУКОЙЛ, Роснефт ва уларнинг шўъба корхоналарига қарши санкциялар жорий қилди. Чекловлар компанияларнинг барча АҚШ активларини музлатиш ва Америка субъектларига улар билан бизнес юритишни тақиқлашни ўз ичига олади. ЛУКОЙЛ тез орада ўзининг хорижий активлари учун харидор қидираётганини эълон қилди. Россия банкининг шарҳида таъкидланишича, Россиянинг Urals хом нефти ноябрь ойида Брент маркасига нисбатан 23% гача пасайган.