Мисрга саёҳат режалаштираётган Ўзбекистон фуқаролари учун кириш тартиби ўзгармоқда. 2026 йил 1 ноябрдан мамлакатга боришни режалаштирган айрим сайёҳлар учун виза, ҳамроҳлик ва молиявий таъминот бўйича янги талаблар жорий этилади.

Ўзбекистон Республикасининг Қоҳирадаги Элчихонаси маълумотига кўра, дипломатик каналлар орқали олинган маълумотлар асосида Мисрга кириш тартибига қатор янгиликлар киритилмоқда.

Янги тартибга кўра, Ўзбекистон фуқаролари Мисрга сафардан олдин кириш визасини Мисрнинг дипломатик ваколатхоналари орқали расмийлаштириши керак бўлади. Шу тариқа, сафарни режалаштираётган фуқаролар виза масаласини аэропортга боргандан кейин ҳал қилишга умид қилмасдан, ҳужжатларни олдиндан тайёрлаб қўйиши муҳим.

Туристик мақсадда Мисрга йўл олаётган фуқароларнинг сафарлари ваколатли туроператорлар орқали ташкил этилиши белгиланмоқда. Айниқса, мустақил равишда саёҳат қилишни режалаштираётган фуқаролар учун янги талабларни олдиндан аниқлаш муҳим аҳамият касб этади.

Янги тартибда энг кўп эътибор қаратилаётган масалалардан бири сайёҳларнинг ёши. 40 ёшгача бўлган фуқаролар Мисрга яқин оила аъзолари ҳамроҳлигидагина сафар қилиши мумкин. Бунда яқин оила аъзолари сифатида ота-она, эр-хотин ёки фарзандлар назарда тутилмоқда.

Бундан ташқари, оила тасарруфида сафар давомида камида 5000 АҚШ доллари миқдорида нақд маблағ бўлиши талаб этилади. 40 ёшдан катталар ҳам молиявий таъминотни тасдиқлаши керак 40 ёшдан юқори бўлган ва Мисрга мустақил сафар қилаётган фуқаролар учун ҳам молиявий талаб белгиланмоқда. Улар ўзларида камида 3000 АҚШ доллари миқдорида нақд маблағ мавжудлигини таъминлаши лозим. Демак, янги тартибда саёҳатчининг ёши билан бир қаторда унинг Мисрда бўлиш даврида ўзини молиявий таъминлай олиши ҳам алоҳида назорат қилинади.

Мисрга кириш вақтида сайёҳлардан бир қатор ҳужжат ва маълумотларни тақдим этиш талаб этилади. Жумладан:

• меҳмонхона брон қилинганини тасдиқловчи ҳужжат;
• мобил алоқа маълумотлари;
• етарли молиявий таъминот мавжудлигини тасдиқловчи маълумотлар.

Шу сабабли сафарга чиқишдан олдин меҳмонхона броньлари, алоқа маълумотлари ва молиявий таъминотга оид ҳужжатларни тайёр ҳолда сақлаш тавсия этилади.

Яна бир муҳим янгилик, Миср ҳудудида бўлиш даврида туристик визани бошқа турдаги визага алмаштириш масаласи бўйича мурожаатлар қабул қилинмайди. Яъни, мамлакатга туристик мақсадда кирган фуқаро кейинчалик ушбу мақомни Миср ҳудудининг ўзида бошқа турдаги визага ўзгартириш имкониятига эга бўлмайди.

Энг муҳим жиҳатлардан бири шундаки, зарур ҳужжатларни тўлиқ тақдим этмаган ёки белгиланган талабларга жавоб бермаган йўловчининг Мисрга кириши рад этилиши мумкин. Бундай ҳолатда фуқаро уни Мисрга олиб келган авиакомпания орқали орқага қайтарилиши эҳтимоли бор.

Шу боис саёҳатдан олдин фақат авиабилет ва меҳмонхона масаласини ҳал қилишнинг ўзи етарли эмас. Виза, ёшга оид талаблар, ҳамроҳлик ва молиявий таъминот бўйича шартларни ҳам олдиндан текшириш зарур.

Мисрга сафар қилишни режалаштираётган Ўзбекистон фуқароларига янги талабларни инобатга олиш ва сафар олдидан Мисрнинг дипломатик ваколатхоналари ҳамда Ўзбекистоннинг Қоҳирадаги Элчихонасидан долзарб маълумотларни аниқлаштириш тавсия этилади.