Ўзбекистонда 2026/2027 ўқув йили учун олий ва касбий таълим муассасаларига қабул жараёни бугун, 5 июндан бошланади. Президентнинг ПФ-81-сон фармонига мувофиқ, бакалавриатга қабул икки босқичли тартиб асосида ташкил этилади.

«Аввал тест, сўнг танлов» тамойилига асосланган тизимнинг биринчи босқичида абитуриентлар 5 июндан 25 июнга қадар «my.uzbmb.uz» платформаси орқали тест синовларида иштирок этиш учун рўйхатдан ўтади.

Рўйхатдан ўтиш жараёнида абитуриентлар фанлар мажмуаси, таълим тили ва тест топшириш ҳудудини танлайди. Алоҳида иқтидор талаб этиладиган йўналишларга ҳужжат топширувчилар эса қўшимча равишда таълим йўналиши ҳамда касбий ёки ижодий имтиҳон ўтказиладиган олийгоҳни белгилайди.

Олий таълим муассасаларига кириш имтиҳонлари июль-август ойларида ўтказилади. Абитуриентлар тест натижаларини имтиҳон ўтказилган куннинг эртасигаёқ билиши мумкин.

Қабулнинг иккинчи босқичи барча имтиҳонлар якунланганидан кейин бошланади. Ушбу жараён 15 кун давом этади ва абитуриентлар олий таълим муассасаси, таълим йўналиши, таълим шакли ҳамда танлов устуворлигини белгилайди.

Талабаликка тавсия этилганлар рўйхати қабулнинг иккинчи босқичи тўлиқ якунланганидан кейин бир ҳафта ичида Билимни баҳолаш агентлигининг расмий сайтида эълон қилинади.

Шунингдек, алоҳида иқтидор талаб этувчи таълим йўналишларига ҳужжат топширган абитуриентлар учун касбий ва ижодий имтиҳонлар белгиланган тартибда ташкил этилади.

Техникумларда ўқиш истагини билдирган абитуриентлар олийгоҳларга қабулнинг якуний натижалари эълон қилингач, 10 кун ичида техникум, мутахассислик ва таълим шаклини танлайди. Уларнинг натижалари ҳам бир ҳафта муддатда Билимни баҳолаш агентлиги томонидан эълон қилинади.