Миллионлаб томошабинлар учун экранда адолат ва куч рамзи бўлиб келган Чак Норрис 19 март куни вафот этди. Актёр кексайиб қолган, шунга қарамай ҳали тетик ва машғулотларга чанқоқ эди. Мухлислар Чак Норрис вафотидан қаттиқ қайғу чекдилар. У узоқ йиллик чақноқ ва чаққон кумир эди. Экранда ҳамиша адолат тантанаси учун аёвсиз кураш олиб борарди. Актёр 86 ёшда эди.

Чак Норриснинг ҳаёти оғир ва сокин бошланган. У 1940 йил 10 март куни АҚШнинг Раян шаҳрида туғилган. Асл исми Карлос Рэй Норрис эди. Оила бошлиғи бўлмиш ота автомеханик бўлиб, ичкиликка берилган эди. Унинг хотини ва болалари билан иши йўқ эди. Шу сабабли оила ночор яшарди. Уйда тинчлик ҳукмрон бўлмас, ўзаро низолар авжига чиқарди.

Оила бекаси Вилма хоним болаларга қўлидан келганча ғамхўрлик қилди. Кейин эса, эри билан келишмовчиликдан сўнг улар ажрашишди.

Вилма бошқа эркакка турмушга чиқди. Ва айнан ўгай ота Жорж Найт бўлажак киноюлдузни спортга жалб этди. Бунга қадар Чак жуда уятчан бўлиб, ўзини паст баҳолар, ҳатто қўрқоқ деб ҳисоблар эди. Тенгқурлари уни масхара қилишар, хоҳлаган пайтда дўппослашлари мумкин эди. Бу бола келажакда дунё танийдиган юлдуз бўлади, дейишса, ҳеч ким ишонмаган бўларди ўшанда.

1958 йилдан Чакнинг ҳаёти ўзгарди. У АҚШ ҳарбий-ҳаво кучларига  хизматга чақирилди ва Жанубий Кореяга юборилди. Жанг санъати билан илк бор ўша ерда танишди. Тангсудони чуқур ўрганди. Шу тариқа ўзининг қўрқуви билан юзма-юз келди. Инсонни кучли қиладиган омил ташқи куч эмас, ички аҳд-қарор эканлигини навқирон Чак ўшанда тушунди. Дарвоқе, Чак Норрис номини у ҳарбий хизмат чоғида олди.

Америкага қайтгач, йигитча бутунлай жанг санъатига берилиб кетди. Бунинг натижаси ўлароқ каратэ бўйича жаҳон чемпиони бўлди. Олти йил давомида мағлубият кўрмади. Кейин эса ўз мактабини очди.

Чак Норриснинг шогирдлари орасида Стив МакКуин ҳам бор эди. Айнан Стив устозига унинг экран учун туғилганини эътироф этди. Бу гап Чак Норрис тақдирини яна ўзгартириб юборди.

Кино оламига кирган Чак Норрис тезда машҳурликка эришди. Унинг иштирокидаги «Аждар йўли», «Бедарак йўқолганлар», «Делта кучлари» ва «Техас рейнжери Уокер» номли филмларни миллионлаб томошабинлар кўришди. Афсонавий Брюс Ли билан жанг саҳнаси эса Чакни абадий машҳур қилди.

Филмларга таклифлар ёғилди. У экранда ёвузликка қарши курашчи, адолатни тикловчи, қўрқмас қаҳрамонларни гавдалантирди.

Чаққон ҳаракатлари, темир муштлари ва айланиб тепишлари туфайли бутун жаҳонга танилди.

Чак Норрис ҳаётида энг муҳими оила бўлган. У икки марта уйланган. Биринчи турмушидан фарзандлари бор. Бу давр Норриснинг қийинчиликлар билан курашган йиллари эди. Иккинчи турмуши — унинг ҳаётидаги адоқсиз муҳаббати Жина О’Келли бўлди. Улар ўртасидаги муносабат ўзаро ишончга асосланган бўлиб, бир-бирига садоқатли эдилар.

Бир йили Чак Норриснинг хотини Жина О’Келли оғир касалликка чалинган. Шунда у кинони деярли тарк этди ва бор вақтини хотинига бағишлади. Бемор рафиқасининг даволаниши учун астойдил курашди. Бу қарори ва саъй-ҳаракати унинг ҳақиқий қаҳрамонлигини кўрсатди. Чак Норрис фикрича, энг катта жанг бу оила учун курашдир. Чак Норрис жами беш боланинг отаси ҳисобланиб, фарзандларини интизомли, меҳнатсевар ва одоб-ахлоқли қилиб тарбиялади.

Вақт ўтиши билан актёр маданий феноменга айланди. Шу аснода «Чак Норрис ҳақиқатлари» бутун дунёга тарқалди. Бу эътирофлар ортида бир ҳақиқат бор эди: у инсон иродасининг рамзига айланган эди.

2026 йил март ойи... Чак Норрис 86 ёшни қарши олди. У аллақачон фаол ҳаётдан четлашган, кўпроқ оиласи билан вақт ўтказарди. 19 март куни Норрис Гавайида эди. Тўсатдан соғлиғи ёмонлашди. Шифокорлар уни қутқаришга ҳаракат қилишди, аммо фойда бермади. Бу актёр ҳаётидаги сўнгги «жанг» эди. Афсонавий кекса спорт устаси ўз оиласи қуршовида ҳаёт билан видолашди.

2026 йил 20 март куни оила Чак Норриснинг вафот этгани ҳақида расман эълон қилди. Бу хабар кино оламини ларзага солди, миллионлаб мухлисларни қайғуга ботирди. Жанг санъати усталари уни “устоз” деб ёдга олишди. Актёрлар эса «ҳақиқий қаҳрамон» дея эътироф этдилар.

«Ҳақиқий куч — ҳеч қачон таслим бўлмасликдир» — бу Чак Норриснинг сабоғи! У қўрқоқ боладан жаҳон чемпиони ва кино афсонасига айланган эди. Афсоналар ўлмайди, улар инсон қалбида яшашда давом этади.

Акбар Фатҳуллаев