Яқин Шарқдаги вазият яна кескинлашди. АҚШ ҳарбийлари Эроннинг Кешм оролидаги порт инфратузилмасига зарба бергани хабар қилинмоқда. Шу билан бирга, АҚШ президенти Дональд Трамп бу ҳужумларни «енгил шапалоқ» деб атаб, Вашингтон ва Теҳрон ўртасидаги сулҳ режими ҳали ҳам амалда эканини таъкидлади. 

АҚШ Марказий қўмондонлиги – CENTCOM маълумотига кўра, Эрон кучлари Ҳўрмуз бўғози орқали ҳаракатланаётган АҚШ ҳарбий кемаларига қарши ракеталар, дронлар ва кичик катерлардан фойдаланган. Қўмондонликка кўра, америкалик ҳарбийлар ўзини ҳимоя қилиш мақсадида жавоб зарбаси берган ва натижада Эроннинг бир қатор ҳарбий объектлари йўқ қилинган. 

CENTCOM АҚШ ҳарбий объектларига зарар етмаганини билдирган.

Эроннинг Tasnim агентлиги эса воқеага бошқача баҳо бермоқда. Унга кўра, Эрон ҳарбий-денгиз кучлари Ҳўрмуз бўғози яқинида АҚШнинг учта ҳарбий кемасига ҳужум қилган. Агентлик иддаосича, бу ҳаракат АҚШ томони Эрон нефть танкерига зарба берганидан кейин амалга оширилган. 

Аввалроқ Fox News манбаларига таяниб, АҚШ Кешм ороли ва Бандар-Аббос шаҳридаги объектларга ҳужум қилганини хабар қилган эди. Эроннинг Fars агентлиги маълумотига кўра, зарбалар натижасида Кешм оролидаги Бахман савдо пирси шикастланган. 

Шу билан бирга, Дональд Трамп вазиятни катта уруш сифатида баҳоламасликка чақирди. Унинг таъкидлашича, берилган зарбалар чекланган характерга эга бўлиб, икки давлат ўртасидаги сулҳ режими сақланиб қолмоқда.

Кузатувчилар фикрича, Ҳўрмуз бўғози атрофидаги ҳар қандай ҳарбий тўқнашув глобал нефть бозори ва халқаро савдо хавфсизлигига жиддий таъсир кўрсатиши мумкин. Айни пайтда минтақадаги вазият ҳали ҳам ноаниқлигича қолмоқда.